~子薑炒牛肉~瑤柱蝦乾鮮腐竹煮脆肉瓜~雙色肉餅~

真係激死我啦!

攪咗成晚剛剛先可以上到個blog!

以為得啦，點知打完篇blog又上載唔到呀?????????

都唔知自己個腦有問題

定係yahoo blog有問題呀................攪到今朝先可以上載到

星期六酸咗啲子薑，今日攞嚟炒牛肉，但係子薑落得太少啦，都唔夠食；

今次酸啲子薑好脆呀，我覺得味道都啱啱好!俾同事個兩樽都食晒啦!

有個同事住係深水埗幫我買咗啲鮮腐竹，今日煮咗佢先，不過啲腐竹煮過耐咗，少少失敗，但真係好過係街巿買嗰啲喎。

又因為要遷就囡囡

同大老爺，所以第一次整個雙色肉餅，佢地兩個都可以食到自己鍾意食個樣!

子薑炒牛肉

[牛肉$20，酸薑]

1.    子薑梗係預先酸啦，早一、兩日都得架啦。

2.    牛肉切片，用雞粉、糖、燒酒、胡椒粉，生抽醃15分鍾。

3.    起鑊落牛肉，攤開煎，灑少許鹽(會夠味啲)，煎好一面，再反另一面。

4.    待牛肉差不多熟，落酸薑炒至熱(酸薑瀝水)，上碟。

***hehe….我覺得今次啲酸薑醃得好好脆呀***

雙色蒸肉餅

[豬肉$15，咸蛋1隻，咸魚一隻]

1.    豬肉挅碎，用鹽，糖，雞粉，胡椒粉，生粉，少許生抽，少許水醃15分鐘。

2.    將咸蛋分開蛋黃同蛋白(參照石大少奶食譜)，用一半豬肉同咸蛋白拌勻，平鋪在碟一邊，。

3.    將咸蛋黃切碎，平均鋪於肉餅上。

4.    咸魚半件，起肉，撈入另一半豬肉，再平均鋪於碟嘅另一邊。

5.    起鑊水滾，蒸10分鍾。

瑤柱蝦乾鮮腐竹浸脆肉瓜

[瑤柱5粒、蝦乾10隻、鮮腐竹$5、脆肉瓜1個]

1.     朝早預先浸好瑤柱，留番啲水備用。

2.     脆肉瓜、鮮腐竹切段。

3.     用蒜茸起鑊，先放瑤柱、蝦乾爆一爆，落埋浸瑤柱啲水，加雞粉1湯匙，鹽，糖，加水蓋上鑊蓋，煮一陣。

4.     再落埋脆肉瓜同腐竹煮至熟。

係街巿見到啲粟米好肥好靚，

又諗起整乜嘢啦!買咗一支粟米，用刀仔逐行挑起啲粟米肉，唔係切呀，如果切係唔會原米架，我係一個超級粟米迷

，好鍾意食!

又食得好奇怪喎，我會用手逐米"檸"嚟食架!

今次加咗啲菜脯、椰菜咁就炒一炒撈埋啲飯，OK!

點解我唔炒啲飯?咁可口又唔熱氣呀!