~Funky Dance~玫瑰蛋糕~

點解香港啲天氣可以熱到咁架?

企係個街度，好似會燒着咁!

晏晝早啲飲茶，食完嘢，

就搭地鐵去上我第一課"Funky Jazz"，

其實真係幾架，無端端過海去上堂，

不過我真係想試下

乜嘢叫"Funky dance"囉!

未跳過真係驚

自己跳唔到?

不竟年紀都唔細，

又驚同學都係靚妹仔，咁就好礙眼啦!

好驚

人地話"亞嬸仲嚟跳"?

因為好早去見又有時間，

走咗去二德買買買................

如果唔係要上堂，

我仲未收手嚟呀!

終於見到啲同學仔，

乜個個都咁瘦嘅?

仲嚟跳?我條腰粗過個膊頭，

C未?

一開始做warm up我已經覺得好倦，

funky dance真係一種好勁嘅舞蹈，我好努力咁去跳跳跳，

跳完真係散晒，對腳最倦呀!

感覺都好好玩，我會keep住跳，一個星期都係跳一次!

今日突然覺得大老爺真係一個好好嘅男人，

有時係街度見到啲男人係女人面前發脾氣，

我就會想起大老爺從未同我發脾氣!

佢每一樣嘢都容忍我!

記得有一年我生日前，

係一本雜誌度見到一個好特別嘅蛋糕，

特登叫大老爺睇(心想希望佢會買俾我)﹐

點知佢嘅反應係望咗一眼就無理我，

我即刻好嬲

，之後都無理呢件事!

點知我生日嗰日，大老爺話去攞蛋糕!

心裏面都無諗到係乜嘢蛋糕!

點知我一打開，

見到個蛋糕就係我想食嗰個呀，

好開心好開心，大老爺係一個好懞嘅人，

就算我俾埋地址佢，佢都未必識去買，

今次佢居然買到返嚟!!!!!!!

我講出嚟係唔想我老人癡心症發作時唔記得!

多謝老公!

 

~無氣~換氣~

係呢度住咗十幾年，

樣樣嘢都舊晒!

最近屋苑要全部換上新的石油氣喉!

就係咁，我又有藉口放假啦!

前後都要安排3日去做，

每次做一樣嘢。

之前我同blog友講，

話我個廚房得2尺X6尺咋!

佢好似唔係好明咁，

俾相你睇啦!

係咁細嘅地方，仲要擺罐石油氣，

真係有啲唔方便，

但係諗落換咗啲舊喉會安全啲!

放假梗係要做個好媽咪啦，

   

一早就去超巿買嘢煮午餐，

都係清咗屋企啲麵餅先，

整個~豉油皇炒麵~(可按-食譜)

再嚟個煎豬扒，呢個係吉之島買啲醃咗嘅!

豬扒係我嘅弱項，我多數都煎到好"鞋"

有冇人可以教我呀?

問親媽子佢都話係咁係咁囉!

但我照佢咁講煎又係"鞋"嘅?

今次煎得都算係咁啦，無啲扒囝囝又話無肉呀!

加多碟油菜攪掂。

下星期一佢地開學啦，

生活回復正常，唔使日日煮到咁大陣仗，

我唔使咁辛苦囉!

佢地呢個暑假都肥咗，

亞囝仲同我講，佢肥咗7-8磅!

(咁咪好囉，個個亞媽都鍾意啲仔女肥少少架啦)

hahaha......................

梗係啦有亞媽好餸，

日日都變肥豬呀!

晏晝換完石油氣，巡下blog，上埋篇蛋糕食譜，

(連表都拆埋，咪無氣囉)

就同咗囡囡出咗旺角行街，

都係去花園街，

囡囡唔係好鍾意出旺角，佢唔鍾意咁多人!

佢今次收穫大囉，睇下佢買咗啲乜?

行過奇趣餅家

又忍唔住買兩件燒餅，我鍾意食無餡嗰隻!

仲買啲香蕉糕俾囝囝囡囡食，

就嚟到中秋，

又勾起我兒時嘅回憶，

如果我細個時有呢隻餅食就開心C呀!

但我多數都無份，亞爸做一份月餅會得兩隻，

我係大家姐，啲豬仔餅都會俾晒細佬細妹食!

行完就join埋大老爺去DIF食飯，

C啦C啦，我部PC short short地呀，快啲打完先!