29~June~2009(一)
天陰有雨
以為自己會無事
返到公司咪當乜事都無囉
點知
原來我放不低
今日返到去個人好緊張
連慣常嘅動作~簽到~都唔記得
要同事提我簽番
個心成日都卜卜跳
個人原來仲係好唔開心
有時覺得好心淡
做嘢幾盡責都無用
唔做咪唔錯囉
做得多咪錯得多囉
啲人要針對你
無論你做咗幾多次對都無用
一次錯誤俾佢捉著就咬住你唔放
咁做咁好做乜啫
擦鞋咪得囉，仲有得升添
使乜做到嘢啫
以後我返工當自己啞咗咪得囉
費事開口得罪人，俾人插死都唔知乜事!!!
【椒鹽排骨】~(食譜按此)
淨係得啲排骨好似寡咗啲
用蒜茸炒少少翠肉瓜墊會好啲!
【牛蒡炒三絲】~(食譜按此)
今次買呢個牛蒡係大陸貨，麻麻地
仲因為佢質地太硬，刨絲嘅時候插親隻手指
上次係日本超巿買嘅牛蒡好味好多!
【蒜茸炒莧菜苗】
突然好想飲一個新年嘅湯水
係印象中，呢隻湯都係冬天飲咁
【髮菜蓮藕蠔豉眉豆花生雞腳湯】~(食譜按此)
ZZZZZZZZ
【髮菜蓮藕蠔豉眉豆花生雞腳湯】
[材料]
雞腳6隻，豬骨$30，髮菜半兩，蠔豉8隻，花生眉豆各半碗，蓮藉1斤，紅蘿蔔1個，果皮一片
[做法]
(1) 髮菜浸軟，搓乾水份備用。
(2) 雞腳及豬骨汆水備用。
(3) 蓮藕、紅蘿蔔刨皮，紅蘿蔔用滾刀法切段，蓮藕分段就可以。
(4) 其餘材料洗淨，滾一大煲水，水滾放入所有材料大火煲半小時，再滾2小時調味即可。
28~June~2009(日)
成日都落雨
仲要一陣大一陣又無雨
變幻無常
噚日朝早焗完油
晏晝俾仔仔囡囡飛咗
得兩個老野去飲茶
兩個人無咗仔仔囡囡係度
不知傾得幾開心
原來
我唔鬧人嗰日真係會開心啲架
可惜大老爺仲係話我"日日都鬧人架啦"
平時食咗飯都返房打blog
邊有日日同佢傾到計呀?
咁又點會日日鬧人呀!
佢好似當咗口頭嬋咁!話得就話!
無解嘅!
唔知係咪心情好呢
平時大老爺咁講嘢我會即刻發火
噚日我竟然仲同佢講笑
原來咁嘅感覺好好
佢講乜我咪駁乜囉
唔使勞氣佢又舒服我又舒服!!!
但係我啲EQ唔高
無幾多次可以做得到架!
見番到屋企仲有時間
又有個水仙芒係度
咪開工囉
整咗諗住攞過去探我奶奶
點知奶奶又返咗去佢屋企
無法啦，又要迫仔仔囡囡食啦!
【芒果糯米糍】~(食譜按此)
今次唔係好得，係個皮唔夠甜又唔夠色
個餡又好難包，麻麻地
不過，我做咗個試驗
將三個放咗入雪柜
原來係唔雪得架
雪咗個皮硬咗好多，都食得但唔軟熟
個芒果就正好多!
【芒果糯米糍】
[材料]
李祥和糯米粉110g，粘米粉10g，木薯粉(泰國生粉)30g，椰汁200g，芒果果汁90g，芒果香油1茶匙，芒果1個，椰絲適量， 糖50g
~9粒~
參考食譜~琦橋媽媽
~~~~~~~~~~~~~~~~~~~~~~~~~~
[做法]
(1) 芒果切粒，可將一些切碎。
(2) 糯米粉、粘米粉、木薯粉倒入大碗中拌勻。
(3) 用小煲倒入椰汁，芒果果汁及芒果香油煮滾後熄火。
(4) 隨即撞入混合粉內快速拌勻。
(5) 將碟噴上菜油，倒入粉糰用中火蒸20分鐘，取出稍為放涼。
(6) 戴上膠手套，用匙幫助取出糯米糰，放在不黏紙上，再蓋上另一張不黏紙。
(8) 用手心略為壓平，放上芒果肉，將邊位之糯米糰包至另一面，然後搓圓， 黏上椰絲即成。
[總結]
~以為芒果汁好甜，所以無加糖，下次要加番50g糖。
~芒果香油唔夠芒果香味又唔夠色。
~水果餡好濕，好難包。
~今次攞咗三個試驗，放咗入雪柜，原來係唔雪得架，雪咗個皮硬咗好多，都食得但唔軟熟，個芒果就正好多!
