又到星期五啦!
放咗工梗係去哨街啦，仲有個同事同我一齊添，
行完就會合大老爺，
今次佢提議搵間新嘅試吓
我點敢話唔好呀!
行咗成條1/4通菜街
終於揀咗呢間
個問口因為裝潢得幾新穎，先吸引到我入去
入到去就唔係幾似樣啦
兩個妹妹仔似新人咁唔多掂，
多少少人就攪唔掂
我地叫咗兩碗麵再加少少小食
睇吓我地叫咗啲乜
呢碗叫'豬骨濃酸辣湯米線'無乜特別，OK啦!
大老爺叫咗'滷味双拼撈麵'，佢話啲麵似出前一丁，但個汁幾得意酸酸甜甜地咁!
'碳燒豬頸肉'無乜特別!
'椒鹽魷魚鬚'個粉漿幾脆，不過就鹽咗啲。
我個麵嘅要而家先嚟喎，等多成五分鍾先炸好!
好快俾我地焚化晒啦!
總括來講，我唔會再去!食完我地仲行埋另外個幾段，發現有幾間都可以值得試吓，試完再報告!
真係唔知自己點解咁大懵
成日以為今日係星期三今日星期四呀死蠢
仲要到中午去跳舞個時先醒起，點解今日有舞跳嘅?
乜唔係星期三咩，哎呀，星期四呀，仲煲咗湯呀!
白果腐竹螺頭豬展湯
[白果2兩、腐竹4片、豬展$30、急凍螺頭4個]
呢個湯係跟blog友vyvy煮的，都幾好飲喎，不過應該多啲腐竹。
不過算啦，今日應該係食麵架，咁煮乜嘢麵呢?
就咁啦，今日就食..............
蠔仔銀針粉
[蠔仔1斤、銀針粉1斤、芹菜2棵、草菇$5、冬菜2湯匙]
1. 芹菜切粒，草菇切片，冬菜浸一浸，搓乾。
2. 燒一鍋熱水，熄火，倒入銀針粉，過一過熱水撈起(因為想沖走銀針粉表面的油份)
2. 蠔仔用生粉醃一會，洗淨，加入胡椒粉、少許鹽飛水。
3. 再燒一鍋水落少許胡椒粉、鹽，加入草菇飛水。
4. 用湯煲燒半煲水，水滾後加入芹菜、冬菜、草菇、蠔仔，略煮一會。
5. 再加入銀針粉煮5分鍾，OK!
好好味呀，因為我地個個星期日係茶樓一定食呢隻粉，要成$35碗架!而家我用咗$38咋，有一大鍋呀!好抵呀!
洋蔥炒無骨牛仔骨
[無骨牛仔骨一盒(吉之島買)(亦可於街巿的凍肉檔買)、洋蔥一個]
1. 先將無骨牛仔骨切丁方，用雞粉、酒、糖、胡椒粉、少許生抽醃15分鍾。
2. 燒熱油鑊，倒入牛仔骨，平鋪在鑊面，灑少許鹽，煎好一面(少許燶)， 再反另一面。
3. 爆香洋蔥，加少許糖，再倒入牛仔骨，拌勻，上碟。
娃娃菜煮頁丸
娃娃菜係前日用淨，切絲用少許雞粉煮貢丸。
呢隻墨丸我就覺得好好食，祇要用平底鑊煎香就好好食。
鳯尾卷我已經介紹過，係公司啲同事定嘅，每條中間都有一隻蝦架!
一早起身梗係開個電視
睇吓使唔使返工先!
八號風球，好嘢，再瞓一陣!
終於九點先肯起身
對於我呢啲"奶茶精"無奶茶飯就慘啦!
好，自己整番杯先，唔係三合一呀，
係同茶莊買嘅混合茶葉焗架，
睇吓似唔似樣，唔，我比五十分啦!頂住先啦!
今日完全諗唔到買乜餸到差不多放工終於決定整........................
蒜茸蒸開邊蝦
[虎蝦一盒，蒜頭8粒，指天椒3隻]
今次嘅虎蝦係吉之島買嘅，大約係$150兩盒。
Step 1：蝦解凍，用廚剪將蝦鬚剪掉，用竹籤挑走蝦腸。
Step 2：將蝦切開二邊，鋪好於碟上。
Step 3：把蒜頭、指天椒挅碎，平均鋪上蝦面，再灑上少許胡椒粉、鹽。
Step 4：用鑊燒滾水，將蝦蒸8分鍾，取出。
Step 5：燒熱油鑊，熄火，落入1茶匙生抽，1茶家樂牌鮮露，1茶糖，淋上蝦面。
Step 1：牛肉切片，用生抽、雞粉、胡椒粉、糖醃15分鍾。
Step 2：雞蛋拂勻，加少許鹽，起油鑊煎熟，備用。
Step 3：起油鑊把牛肉落入，用鑊摌把牛肉散開，灑上少許鹽，一面煎好才反另一面，至九成熟盛起備用。(牛肉要煎嘅時候先落鹽才夠味)
Step 4：用少許油把蕃茄爆一爆，落一碗水，3湯匙茄汁，3湯匙黃糖，蓋上煮10分鍾。
Step 5：加入牛肉及雞蛋拌勻，埋獻，上碟。
鮮菇燴娃娃菜
[娃娃菜一包，鮮東菇5隻]
Step 1：把娃娃一開4-6(視乎菜本身大小而決定)，鮮東菇去頂切片。
Step 2：用鑊加入3碗水，燒滾，再加入雞粉、糖、鹽(可用雞湯代替，若用雞湯不用再加鹽)
Step 3：把娃娃菜灼熟，用筷子把菜鋪好在碟上。
Step 4：把鑊上的菜湯保留，倒入鮮菇，加入蠔油3茶匙，糖2茶匙，少許生抽，煮熟鮮菇。
Step 5：用生粉水埋獻，淋上娃娃菜面，OK!
