~蝦醬鮮魷蒸聖瓜~洋蔥煎安格斯牛肉漢堡~椰菜炒魚片蟹柳~薯仔蕃茄豆泡牛肉湯~

好多時我煮啲餸

大多數家庭主婦都識煮

但為咗方便有需要的blog友

我都會逐個step寫出來

希望你地用得著!

如果你地識煮，就睇吓相啦!

上次睇到阿依整嘅蝦醬鮮魷蒸豆泡

所以攞咗靈感整咗兩個餸!

另外，我同同事一齊訂咗一批凍肉，

今日用咗"安格斯牛肉漢堡"先，

點解我定呢樣，因為我無見過街巿有呢樣嘢買囉!

~蝦醬鮮魷蒸聖瓜~

[鮮魷一隻(大，以厚為佳)，聖瓜1條，蝦醬1湯匙]

1. 鮮魷洗淨，"介"花切件，用生粉醃一醃，再清洗一次，瀝水。

2. 聖瓜刨去硬皮，切段，先灼一灼，瀝水，再平鋪係碟上。

3. 鮮魷落鹽、糖、燒酒、生抽少許、胡椒粉、蝦醬1湯匙拌勻。

4. 將鮮魷鋪係聖瓜面，再灑上少許蒜茸。

5. 燒一鑊水，水滾蒸10分鍾，上枱前將多餘水份倒去。

你地見過呢種聖瓜呀?平時係街巿見嗰啲都係又長又瘦，今次呢種又肥又短喎，不過食落又無乜分別喎!

~洋蔥煎安格斯牛肉漢堡~

[安格斯牛肉漢堡3塊，洋蔥一個，蒜茸1湯匙]

1. 洋蔥切條，牛肉漢堡解凍，切件。

2. 先爆一爆洋蔥至軟身，盛起，備用

3. 用少許油起鑊，放入漢堡，灑上蒜鹽，落埋啲蒜茸。

3. 煎好漢堡後，再將洋蔥回鑊，加入日本燒肉醬拌勻，上碟。

呢度有7件1kg-$68

~椰菜炒魚片蟹柳~

[椰菜1個，魚片半條，蟹柳6條]

1. 蟹柳切半，魚片切粗條，椰菜切條。

2. 先爆魚片，邊邊有少許燶，落椰菜，拌勻，落少少水，加鹽、糖蓋上蓋煮一陣。

3. 差不多煮好落埋蟹柳，煮熱，上碟。

~薯仔蕃茄豆泡牛肉湯~

[薯仔2個，蕃茄4個，豆泡$3，牛肉$10]

**豆泡洗一洗，用手搓乾水，開邊。

以前細個亞媽都成日滾蕃茄雞蛋豆泡瘦肉湯，我細妹鍾意食豆泡，因為啲豆泡浸咗落湯度，係好入味架!