差不多放六日假，
唔係去旅行喎，係之前諗住會OT，
咪OT前放下假囉，
點知OT取消咗，成個假期都約晒人，
咁又可以懶多幾日囉!呵呵
~伴手禮~
暫時我最有信心做嘅都係合桃酥，
因為放工先整，呢個剛好夠時間做!
唔知幾時先有其他好嘢送俾人呢?
今次用咗(低筋粉 300g、梳打粉 4g、泡打粉 8g、固體菜油112g、豬油40g、糖 120g、蛋汁 24g、糖漿 8g、水 30g、蛋黃 1 隻)
做咗42隻(每隻15g)
今次做細啲添，想做到一口一個!
靚唔靚呀?超簡單，無乜技巧!
不過最好留多啲空位俾佢發大，咁仲會靚仔啲，
因為時間關係，擺得好密!
主席之前見過，我仲日日都探佢架，
小丸子我就未見過啦，
話你知啦，佢係.............................女人嚟呀，
係一個靚靚媽咪，佢真係好鬼C得意，又好傾又鬼馬!
我地三個女人真係一個墟!
有傾唔完嘅話題，緣份真係好奇妙呢!
為咗尊重佢地，有影相不過唔可以post出嚟啦!
今日去咗西灣河，食車仔麵，
呢間係太安樓嗰檔車仔麵，
經亞蘇介紹之後，搬咗嚟呢度，
千祈唔好以為而家太安樓嗰檔係亞蘇介紹嗰檔呀，
"好記"
係之前問同事先知個地址，
以為搬咗入鋪會大啲，
但個亞姐真係好nice，啲嘢都好味，但無灣仔晏頓街嗰間好食囉!
睇下我地食乜?
之後坐小巴過海入將軍澳，好方便喎，
好快入到去，
因為小丸子話想食糖水，
聽聞將軍澳有間好出名嘅糖水鋪"聰嫂"
今日去試下先!
我梗係搵啲特別啲嘅食啦，呢個係薑汁涼粉，
啲涼粉好似意粉咁架，之前係雜誌都睇過，好想試，真係唔錯!
都fit過我，係咪時候又要keep fit呢!
係主席係百忙之中，用寶貴嘅時間做俾我架，
佢居然記得我生日啊!
我係第一次收到朋友親自整嘅蛋糕!
主席為咗整呢個蛋糕，仲整隻手呀!
多謝晒!
而小丸子............就送咗成打麵包俾我!
好得意喎!
本來想偷懶唔煮飯，
但又唔想再出街，咪買嘢返打邊爐囉，
洗咗就得，簡單好多!
今次係用我妹妹介紹嘅豆漿湯底，佢話好好味喎，
清熱又有一片片類似腐竹的係湯面架!
好好味!
我打邊爐啦!
11111111
回覆刪除[版主回覆10/29/2008 19:54:00]乜你咁快嘅? 你唔使食飯?我而家仲等緊大老爺返嚟打邊爐呀!
妳個blog會令到人好肚餓呀!!!!!!
回覆刪除[版主回覆10/29/2008 21:00:00]咁你食咗飯味呀?
食咗先講嘛,我未食過架可能..... 好好味呢
回覆刪除嘩 妳仲整個大特寫添,整得唔係好靚喎,應該可以好d架,不過妳下次唔好再係初一十五啦...
預祝妳今年有個開心嘅生日 唔好再去淺水灣坐啦
[版主回覆10/29/2008 21:38:00]你用海綿蛋糕做底我鍾意呀，我唔鍾意食餅底架!不過自己整唔到海綿蛋糕咋，可以敎我整海綿蛋糕嗎? 唔係呀，你脫個模好靚喎，食咗啦，好味呀， 但少啲甜就perfect啦， 事關我食乜都係走甜嘅，唔關你事，係我唔鍾意食咁甜啫!所以你食個合桃酥可能覺得唔夠甜喎! 收到!咁初二啦! 我同佢講過兩次話聽日去南丫島行，佢居然問我你係咪話去大嶼山呀?今日又問我係咪去西貢呀?我同佢講過兩次，我唔會再講架啦!我問佢咁你不如講多兩個地方呀，佢話係呀一定有個地方中架!
我刚才留言不见了！
回覆刪除[版主回覆10/29/2008 21:41:00]嘿............咁你講乜架? 我無見過嘅???????
唔係喎我頭先食完妳個合桃酥喎,都好好味喎
回覆刪除唔記得同妳講我係用泰國蛋架 妳無食到d提子咩
妳講笑咩叫我教妳 點敢呀,妳估我好勁咩,最重要果個步驟都要搵亞貴師傅黎監工咋,妳知啦 送俾妳會有壓力嘛
[版主回覆10/29/2008 22:04:00]送俾我有壓力??????????你見過我整蛋糕咩! 我真係想問點先可以成功整到個海綿蛋糕呀，你有冇見過我上一次個海綿蛋糕，簡直係慘不忍賭呀!你幫我問下貴師傳呀! 我整親乜都減糖架，所以驚你地覺得淡囉，我整啲嘢好簡單咋，幫我多謝貴師傅嘅寶貴意見，我下星期整芝士蛋糕會較細啲火啦! 你都唔好以為我好勁呀!唔見得人架!
d 合桃酥好得意呀, 我都要試吓整比我爸爸媽媽食.
回覆刪除收到朋友送嘅手工蛋糕梗係開心啦, 我都唔知幾時先可以做到一個似樣嘅送比人呀!!
[版主回覆10/29/2008 22:23:00]我都末整到個靚蛋糕，一齊努力啦!
豆漿湯底---->>> 我去年都試過~用來打邊爐的事,
回覆刪除真係好正~~
[版主回覆10/30/2008 06:08:00]但係大少話佢都係鍾意沙爹湯底喎!
妳都好多時約blog友見面喎.....
回覆刪除[版主回覆10/30/2008 06:07:00]係呀，近排好忙，仲有啲blog聚嚟緊呀!
嘩!!好靚呀!!咩味嘅蛋糕嚟呢??? 咁你平時鐘意食咩味嘅蛋糕呀????
回覆刪除[版主回覆10/30/2008 06:06:00]係芝士蛋糕，用海綿蛋糕做底，做到好似出面買咁呀，個邊都做得好靚!
見到小丸子嗰陣，佢有無唱番首 " be li ba la be li ba la ……" 主題曲你聽？
回覆刪除[版主回覆10/30/2008 06:05:00]佢無唱喎，我追佢補番俾我先!
港島食到去將軍澳 真係犀利呀~ 唉~ 講起手信............. 我開始唔敢出黎啦 都唔知點好
回覆刪除[版主回覆10/30/2008 06:03:00]係呀，得閒咪去試下囉，你唔見小丸子都無整嘢咩，又無人話要一定識整嘢先可以出嚟見人?
我返來啦,不過好眼訓呀!!!!!!
回覆刪除good night baby!!!!!!!!!!!!
[版主回覆10/30/2008 06:01:00](Empty)
呀~~~~車仔麵!!!.....好想返hk呀!!!!!!! 但有排都未可以返呀!!!
回覆刪除係呀,想問你知唔知 梳打粉,泡打粉,固體菜油 既英文呀??因為我都好想食新鮮合桃酥啊!!!我要自己整!!!澳洲有唐人麵包舖既,但整得好奇怪,唔好食.....好想好想食番D香港嘢呀~~~
[版主回覆10/31/2008 07:05:00]唔好意思咁遲先覆你，咁自己整車仔麵囉，買啲麵餅，整啲咖喱魚蛋，冬菇、韮菜! 遲啲搵到資料話你知! 合桃酥好易整架!自己整健康啲!
個蛋糕好令呀, 真係好似街賣個 d 呀 !
回覆刪除你整 d 合桃酥咁正, 幾時請我食呀 ?!
去左咁多地方, 三個女人真 happy ! 今日你又去邊樹呀 ?
[版主回覆10/31/2008 07:06:00]哇............唔好嚇我啦，你整啲仲靚仔喎! 個蛋糕係芝士蛋糕嚟! 三個女人講咗幾個鐘都唔停呀，好開心!
我有個問題(講笑咋),點解成日都要老遠去食車仔麵呢 係唔係真係好好食..................
回覆刪除[版主回覆10/31/2008 07:07:00]因為想食囉，係咪為食呢，係我叫佢地去試架! 呢間唔係好好食.........灣仔嗰間好味好多，但西貢嗰間我未試過!