大老爺生日!!!

祝老公生日快樂!!!

健健康康

快快樂樂

金銀滿屋

壽比南山

哈哈哈................

雖然前兩日俾佢激到我C下C下，

都要為佢慶祝，

我都算唔話得啦，

特登放假整蛋糕俾佢食，

唔好食都唔好講俾我知呀!

一早同大老爺去食完早餐，

就返屋企開工，

心情戰戰兢兢，

真係未試過成功做個蛋糕，

次次都衰嘅，

真係無乜信心，

揀咗個易啲成功嘅焗芝士蛋糕，

應該唔會衰掛!

整咗差不多2個半鐘，

睇少一眼就焗燶咗個面，

因為掛住整甜品，

大老爺咁嘅年紀，應該唔好食咁多甜品，

見佢成日係超巿買啫喱食，

今日又放咗假，梗係整番甜品俾佢食啦，

話晒佢今日係壽星公!

~焗藍莓芝士蛋糕~(詳細食譜)

上網摷咗好多食譜，個個都唔同，

有啲加蛋白霜，有啲加粟粉，有啲加低粉，

攪到頭暈暈，都唔知跟邊個好，

最後都係參考琦~橋媽個食譜，

人地個食譜話焗一個鐘，我焗咗半個鐘以為得，

因為個面都燶咗少少，其他食譜好多都係話半個鐘，

但出咗嚟好似唔多掂咁，

又放番入去用150度焗多15分鐘，

好彩都算係成功!

仲係超成功，甜度啱啱好!

食落仲好好味添呀，因為我落咗好少糖，

所以好好味又唔甜!!!

~芒果啫喱奶凍~(詳細食譜)

本來唔係用奶凍，

想做芒果慕司，

但行咗成個街巿，一個芒果都無呀!

夜晚，

出咗去打邊爐，

本來囡囡話唔係好舒服，想係屋企，

但又唔想係屋企食完，

要大老爺洗咁多嘢!

近近地去咗新蒲岡食自助火鍋，

都幾抵，$68任食任飲包湯底，

不過要加$22茶芥，

四個人埋單$396，好過係屋企洗餐死!

食到飽飽返屋企，

梗係要攞個蛋糕出嚟啦，

本來諗住個個食到咁飽，

係咁易切少少出嚟食，

點知好細食嘅囡囡都要添食，

囡囡同大老爺每人食咗兩件!

Yummy!Yummy!