慳得就慳!!!

星期日

飲茶日

又係平時咁，飲完茶去入貨，

係買中筋粉呀，而家成日整包，

發覺中筋粉係最好嘅，

但唔係度度有得買，

二德惠就無啦，九龍城同信和都有得買，

信和平2蚊，唔好以為信和啲嘢平啲，

其實間間都有平有貴!

方便去邊間就去邊間。

買完粉又去街巿買湯料，

通常我都係每個星期一都煲一次老火湯，

今次買咗蓮藕煲湯!

去埋百佳買米同豬肉，又幫同事買咗個好平嘅打蛋器，

咁平唔知耐唔耐，不過同事唔係成日用，應該無問題，

之後同囝囝買咗個書包，

都唔知係咪男仔係咁樣呢，

用乜都用得好粗，成日都爛!

今年已經係第三個書包啦!

 

 

晏晝係屋企又係整包，

通常整一次可以做我同囡囡兩日嘅早餐，

今日都每人食咗一個!

朝早起身做咗個中種先，發咗個半鐘，

放入雪柜先，驚佢會過度發酵，

返到屋企再搵出嚟抖半個鐘!

就開始整包，

星期五MAmiPOHpoh送咗盒三文魚俾我，

星期六已經食咗大半條，

淨番少少，咪用咗嚟做包!

呢條三文魚真係好好味，

大老爺都食到唔停口，

我都覺得好好味!

~芝士包~火腿包~三文魚包~(詳細食譜)

囝囝用咗四百蚊買咗張入場卷，

去海洋公園玩，

都唔明咁貴都去!

不過囝囝儲到錢，

自己俾錢買飛!

所以今晚得三條友，都係係屋食好啦，

~香蒜肉絲意~

~上湯浸娃娃菜~

大老爺仲有煎牛扒，不過我無影到囉!

咁就一餐，好過出去食又貴又少餸，

而家樣樣都咁貴，

慳得就慳啦!