THL!!!

16~Jan~2010(六)

天氣暖咗少少

呢種天氣最舒服

今日開埋最後一日OT

咁生活將會回復正常

但臨近過年

又要忙整糕啦!!!

整好個生日蛋糕

梗係要做速遞啦 

噚日攞俾個壽星女

約咗係灣仔嘅OUTBACK食晏

之前食過一次覺得幾好

所以今次都選擇呢度

點知大失所望

最主要係服務水準勁差

朋友一早訂咗位時

講明要卡位

雖然知道唔一定俾到卡位

咁都會盡量安排嘛

點知俾咗張好細嘅枱我地

當我地問佢嘅點解無卡位時

個男伙計居然用好高嘅聲調

問我朋友：小姐訂位時...有冇話一定可以俾到卡位先?定係話或者呢?

(咁係咪話我地唔啱呀?)

我究知實係講咁架啦

但好多餐廳都會盡量安排嘛

但唔係用咁嘅態度回應嘛

不如訂位時

話明無得定卡位仲好啦

做乜話俾人聽盡量啫?

又話換位要等十至十五分鐘

成餐飯食晒

根本無諗過安排我地轉枱

叫餐飲又等咗半個鐘

追咗幾次

最後都要打包走

因為趕住返工!

呢度幾乎全部伙計祇係識講英文

連廣東話都唔識聽

你估係外國咩

係香港開餐

祇係得一個男人識講廣東話

態度又囂

我連一蚊貼士都無俾呀

亦都唔會再去第三次啦!

嚟呢度就係為咗呢個包

好好味

不過講唔出用乜嘢做呢?

先嚟個湯，我少飲忌廉湯

但呢度啲忌廉好好飲架

沙律

今日叫咗一個牛扒一個意粉

同朋友一齊分享

呢個所謂牛扒

祇係四片好薄嘅牛扒

好失望

今次送出之生日蛋糕

朋友噚晚已經食咗啦

仲話幾好味天

安樂晒!!!