2008開平珠海澳門之旅(二)

 2008開平珠海澳門之旅(二)

我地間23號別墅!兩層高架!上面間大房仲有個大露台架!

係山丘上幾開揚!

每間別墅仲有私人溫泉架，不過唔知點解唔放水?

26-Dec-2008(五)晚

第一晚，我地係入住香江溫泉渡假村!

呢間渡假村都好耐啦，不過最近重新裝潢過，

接待香港團!

不過，佢地啲服務水準真係唔掂!

個個服務員態度都好差!

我地十一人分到一楝別墅，唔需要同人share，

如果唔係都好唔方便，

因為每楝別墅祇有一台電動麻雀枱，一部有卡拉OK!

如果同其他團友share，咁就唔知邊個用好啦!

亦都無咁盡興!!!!!!

 

 

房間都唔錯，我地呢楝有五間房，

下層有三間，上層有兩間!

我地擾攘一陣後，分配好房間之後!

本來想浸溫泉，但又夜又凍，

諗住聽朝食完早餐仲有時間浸!

就出咗去買煙花玩，大人同小朋友都玩得好開心!

細佬妹夫同老豆媽子打麻雀，

我地三姊妹就唱K，

真係未試過三姊妹一齊唱架，

我地唱足成晚，唱到1點先瞓，夠晒皮!

今次先知三妹唱粵曲咁得嘅!

佢可以同一時唱男聲同女聲!

仲鬼咁好聽!

 

 

27-Dec-2008(六)

我地好早去咗食早餐，

又係自助餐呀，

不過經過噚晚嘅經驗，都無乜期望，

諗住食飽個肚算啦!

點知又見啲服務小姐又同人嗌交，

見人地係跟團都知包早餐啦，俾早餐卷又唔俾話講就得，

咁啲爸媽帶住啲細路梗係一間房，唔通啲細路唔使食咩?

又唔係佢啲大陸人，邊個呃佢地呀?

咁嘅服務水準，超唔掂!!!

食早餐時，

見到個溫泉點解有人著住衫都入到去溫泉區度嘅?

乜啲人好似行公園咁!

原來係人都可以入去參觀，唔使住客証架!

咁同公園有乜分別呀?

我地都入咗去睇下環境先決定浸唔浸，

見到好多個池都無乜水，

8點開始都未入水?咁點浸呀?浸腳都唔夠啦!

最後我地都決定唔浸啦，好似表演咁咪攪!

睇下呢度啲別墅先啦!

 

 

 

 

10點半交匙出發，

第一站~赤坎歐陸風情街~關氏書院

呢條街係電視劇~"東山飄兩西闗情"嘅拍攝場地之一。

又係一條好普通嘅街，有啲攤檔咁，都買咗少少小零食!

睇下媽子同兩個妹睇得幾入神!

(知唔知邊個係呀?)

Christina又被美食吸引啦~麥芽糖

呢個南瓜餅又熱又新鮮，幾好食，媽子仲教我點整添!

~關氏書院~

一間好細嘅房，唔知有乜好睇，

又無人介紹!

第二站~雅居樂休閒會所HI-TEA

呢個行程係去雅居樂會所內一間西餐廳飲杯奶茶，

食啲生果同送個燕窩蛋撻!

跟住同啲小朋友去睇咗兩場4D電影$50，

睇完就一齊去揼骨，我地按咗一個鐘腳!

啲水準唔掂，

啲師傅同祈福無得比!

 

 

今晚晚餐係"豬肚雞"

豬肚雞係一個湯底，仲有啲配菜用來打邊爐!

呢幾日呢餐最正，個湯好好飲!

 

 

 

 

食飽飽返酒店~華廈國際商務酒店~

唔知係咪我地乖呢，領隊Joey俾咗間connect room我地，

我同二妹一人一間，

我地好開心，因為無咁驚ma!

講真，無老公係度，

住酒店我都有少少驚架!

佢地三表姐妹成晚走來走去!

(我同兩個細妹，每人都有個女)

佢地有佢地玩，我有我瞓囉!

明天繼續...........