小BLOG聚
因為得三個人，算係小BLOG聚啦，
開BLOG以來，認識到唔少朋友，
Frances & Rachel都認識咗半年，
係Frances個blog成日都會見到呢個小妹妹，
個活潑可愛，
我真係好鬼C鍾意佢架啫!
之前我地已經見過兩次面，
Rachel小妹妹係一個好熱情嘅小朋友，
唔知點解我同佢好好傾，
佢都幾聽我話架，我同佢好有緣，
唔知係咪自己啲仔女大咗，
見番啲小朋友都好喜歡!
Frances成日話佢煩，我又唔覺喎，
我好鍾意拖住佢隻小手，
十二月三日係佢六歲生日，
我胆粗粗咁應承咗送蛋糕俾佢，
應承小朋友嘅一定要做，
雖然我唔係好識整蛋糕，
之前烘焙姐姐俾咗個芝士凍餅嘅食譜我，
噚日放下晝假返屋企整餅，
第一步，做個海綿蛋糕先，
呢個都算係我第一個海綿蛋糕，
都算幾成功!
跟住整個cream芝士﹐
加糖打蛋加魚膠加cream芝士，
點知放好個海綿蛋糕，倒入芝士餡後，
好特別嘅情就出現啦，
C啦C啦..........點解片海綿蛋糕會升咗上嚟嘅?
以為片蛋糕唔夠重，嗱嗱聲放多片落去，
點知仲衰，攪到一pat pat咁，
好肉酸呀!救命呀!
有冇人話到俾我知發生乜事呀?
好彩屋企仲有材料，
今次唔敢再放海綿蛋糕啦!
因為再失敗的話，今日就無貨交啦!
用番之前做嘅芝士餅底，
再攪一次cream芝士餡，
雪咗就出去同大老爺食飯，
返到屋企即刻再開工，
其實我有兩種生果想用嚟做餅面裝飾，
士多啤梨同桃，最後都係用咗大路嘅士多啤梨!
士多啤梨芝士凍餅~(詳細食譜)
仲將多餘的啫喱做咗幾杯士多啤梨啫喱杯!
咁個失敗嘅蛋糕點處理呢?
佢係食得嘅，不過醜樣啲啫!
今朝大老爺見到都話唔食，點算?
哈哈...........加啲可可粉係餅面，
咪可以變咗Tiramisur囉!
點知探完Frances返到屋企，
呢個如月版Tiramisu食淨咁少咋，
好彩都有番一件自己試下，
啲cream芝士索晒入啲蛋糕度，
所以淨番啲cream芝士係底部，
所以好似食蛋糕多過似凍餅，
希望整俾Rachel嗰個好味啲啦!
可以將個蛋糕反轉佢做底,個面就再掃蛋黃用火燒就已經唔覺啦(不過我想問食落有無問題先 )
回覆刪除[版主回覆11/29/2008 21:21:00]味道就無問題，如果有問題就唔會銷情咁好啦! 但個質感就似蛋糕多啲.......因為個兩片海綿蛋糕索咗大部份cream芝士!
2
回覆刪除[版主回覆11/29/2008 21:32:00]都好呀!
多謝您的"愛心旦糕",好好味~"因為它是"輕甜"的,
回覆刪除合哂河車.
食評: 滿分~~
[版主回覆11/29/2008 21:38:00]係咪真架，要講真喎，我要改善架，如果有乜唔好嘅? 我唔鍾意甜，但忘記得咗俾小朋友，應該要正常先啱!
要講真喎，我要改善架--->>> 對我來說,沒甚麼需改善.
回覆刪除而我剛剛也有問囡囡,如月姨姨個旦糕好唔好食??
佢也說好好食.其實小朋友也不應吃太甜的,
因為又凍又太甜的話,好易咳, 現在剛剛好的了~
[版主回覆11/29/2008 21:54:00]多謝!咁我就放心啦，起碼食得先啦! 聽日去邊度玩呀?仲未諗到?
我鍾意如月版Tiramisu呀.
回覆刪除[版主回覆11/30/2008 07:55:00]早晨，都係正宗Tiramisu好味，好似你公司嗰啲呀!
真係峰迴路轉,咁都救得番個蛋糕,你係得嘅!!
回覆刪除[版主回覆11/30/2008 07:54:00]早晨，其實個蛋糕救唔番架，留番自己食，整個樣靚啲，而家咪銷晒囉!
都幾好呀，有兩個食，將錯就錯嘛！邊有問題呢！
回覆刪除[版主回覆11/30/2008 07:53:00]早晨，無理由掉咗佢ma，又唔係唔食得!
你好醒目啊~~~創出如月tiramisu!!!應該幾好味喎!!!
回覆刪除[版主回覆11/30/2008 07:52:00]早晨，邊有真正Tiramisu咁好味啫，不過個樣無咁肉酸啫!
HAHA~ 佢地把口話唔食 襯你唔係到 食鬼晒呢
回覆刪除[版主回覆11/30/2008 22:02:00]哈哈....係喎，差啲一舊都無得食!
如月:平時貴師傅教我哋整嘅cream cheese cake嘅cream唔係咁流質呢~ 佢係cream狀，所以唔會比蛋糕索到水份而昇起呢~ 材料度佢會加入埋打起咗嘅淡忌廉呢~
回覆刪除[版主回覆11/30/2008 22:02:00]哈哈....呢次可能相錯人，九龍城個姐姐咁教我架，我都係試下，點知淡忌廉唔打起真係唔得架，好食，但要做餅底先得!
好驚險喎！又好成功呢！如果唔係點會被偷食哂呢！
回覆刪除[版主回覆11/30/2008 22:00:00]哈哈....真係好驚險架，諗住整唔到咪買個現盛俾小妹妹囉!
哈哈, o個頭話唔食, 結果個蛋糕都比人偷食晒! 包裝真係好緊要呢!
回覆刪除[版主回覆12/01/2008 05:55:00]早晨，估唔到多層可可粉會咁好呢!
你睇我做 果個 搞笑版，重嚇死你呀!
回覆刪除你個譜我偷埋喇，下次試做。實在好靚呀!
[版主回覆12/01/2008 11:46:00]早晨，我都係第一次整咋!記得用餅底做!
早晨呀! 變 Tiramisu ? 真係好掂喎~~~
回覆刪除[版主回覆12/01/2008 13:46:00]唔掂都唔得啦，之前大老爺話唔食喎咁肉酸!
雖然我係整餅初哥, 但都想講少少.
回覆刪除我唔知係咪有兩個(或更多)整法, 我見人地多數打起淡忌廉先溝埋落芝士糊度, 咁樣應該唔會浮.
同埋, 我又見過人地係整餅底 -> 加少少凍餅糊 (用黎黐住個餅底同蛋糕)-> 加海綿蛋糕 -> 加埋其他凍餅糊 -> 加裝飾
你睇下咁樣↑↑會唔會好 d?
我自己未加過海綿蛋糕呀~ 不過好快會試.
[版主回覆12/04/2008 22:33:00]好多謝你呀，我之前學的都係打起啲淡忌廉! 但呢個食係烘焙店個姐姐教我架，佢話好正咁我咪試下囉，點知出咗事! 你個用少少凍餅糊個方法都應該行得通，等我試下先!大家一齊努力啦!