~香蒜肉絲意粉~
呢個意粉大老爺次次去pizza hut必叫的，除咗呢個意粉之外，大老爺乜都話唔好食架!佢最憎去pizza hut，次次都係因為陪我同啲細路!如果我識整自己pizza，咁就以後都唔使去pizza hut囉!
係Miss Jubie度見佢整得咁靚，又唔係好難咁就試下啦!不過今次無買到火腿，所以差少少似!
[意粉1.5mm 1包(鍾意粗啲可以粗意粉)，蒜粉，豬肉碎$15，火腿2片，雜豆半包，牛油2片(厚)]
1. 豬肉挅碎，用雞粉、胡椒粉、糖、蒜粉(鍾意蒜味重可落多啲)、鹽少許、麻油醃半小時，要加少少水入豬肉度醃，咁樣可使豬肉炒起唔使一舊舊。
2. 火腿切條，雜豆洗淨汆水備用。
3. 水滾落少許油同鹽，落意粉，煮5分鐘焗5鐘，取出沖凍水，瀝水備用。
4. 用少許蒜茸爆香豬肉碎，至八成熟倒入雜豆同火腿，至全熟盛起。
5. 用牛油起鑊，倒入意粉落少許鹽、蒜粉、糖炒至熟試味，倒入豬肉料兜勻即成。
食後感：有8、9成似pizza hut!但個意粉煮耐咗(無睇火)，淋咗少少。有1成係因為無買到火腿呀!.............90分
哩個我都整過真係好好味架。但我只係最後用微波爐叮唔係焗囉。
回覆刪除[版主回覆08/25/2008 06:35:00]唔使焗喎，都好好味!我趕時間都無放入焗爐焗，味道都好好，祇要你炒得乾身啲都得!原來咁易整喎!
你成日都整咁多美食，令我心思思又想做番一個勤力的煮婦！
回覆刪除[版主回覆08/25/2008 15:02:00]乜你而家唔係咩?
我好慚愧呀，而家懶得就懶！PohPoh年紀大0麻!
回覆刪除[版主回覆08/25/2008 15:22:00]懶就懶，又報大數!有相為証，你有幾老呀?
好正呀 !! 想試煮, 可否提供調味份量, 因為我唔識預要跟住份量先得, Thanks !!
回覆刪除[版主回覆07/08/2011 10:20:00]
你指係蒜鹽嘅份量? 雞粉1茶匙、胡椒粉少許、糖1茶匙、蒜粉1-2茶匙(鍾意蒜味重可落多啲)、鹽半茶匙、麻油少許!