~忙碌的一天~甜筒~

開咗學第二日啦!，囡囡仲係放下晏!

又要為佢預備午餐，

通常我放假我都會忙過返工，

一早出咗去街巿買餸，

因為想早啲返嚟開始整包!

今次行咗去呢個街有好多嘢買，

去呢度係想買啲茶果食，

無乜地方有得買嘅"雞屎籐"

以前媽子久唔久都會整俾我地食，而家好少見囉!

仲有好軟滑嘅糯米糍!

買完餸就開始整包啦!

一路整一路向師傅求救，

又開咗BLOG友師奶仔上次教我嗰篇BLOG嚟睇!

師傅好細心咁解答我嘅問題，

都係多得佢咋，

原來淨係睇書係唔夠架!

終於我第一個腸仔包出爐啦!

雖然做得唔係咁好，但攞咗個經驗，

下次會識得點樣做!

~腸仔包~(可按~製造過程)

個樣都OK啦，但實際有好多問題，

味道唔夠香，包唔夠鬆軟，

做包其實幾難掌握，

小小溫度小小差別，都會令個包發得唔好!

希望下次會好啲!

晏晝淨係煮咗個麵俾囡囡食，

個魚蛋係心心嚟呀!

囡囡返嚟時買咗甜筒俾我食，

因為之前我提過想食甜筒但又無買到!

佢真係好錫我!

希望佢俾心機讀書啦!

是日晚餐

~魷魚頭蝦醬蒸豬肉~(可按-食譜)

係街巿見到有呢啲魷魚頭乾買，又唔貴又香，

好耐無食，買嚟蒸下豬肉先!

~蒜茸豆豉煮花甲~(可按-食譜)

花甲同蜆有乜分別我唔清楚喎，

亞姐話呢隻仲好食，咪買嚟試囉!

都係蜆好味啲!

~豆角鮮菇炒豬扒~

因為有幾塊豬扒食唔晒，咪攞咗嚟煮豆角!

~蒸魚~

大少話我近排好少蒸魚喎!整返一條俾佢食啦!

~薯仔蕃茄粟子牛肉湯~(可按-食譜)

大少大小姐飲咗居然問我啲湯點解有蠔味喎!

 

~魷魚頭蝦醬蒸豬肉~

~魷魚頭蝦醬蒸豬肉~

[魷魚頭乾15隻，豬肉$15]

1. 魷魚頭浸15分鐘，去眼洗淨瀝水。

2. 豬肉切片用鹽、糖、生抽、酒、胡椒粉略好，加入2湯匙蝦醬拌勻。

3. 將豬肉先鋪好在碟上，再將魷魚頭放係豬肉面。

4. 用大火蒸10-12分鐘即成。

今朝係街見到呢樣好耐無食嘅食材，魷魚頭，好香真係好香，蒸豬肉最啱，可以送幾碗呀!

~薯仔蕃茄粟子牛肉湯~

~薯仔蕃茄粟子牛肉湯~

[薯仔4個，蕃茄6個，粟子半磅、牛肋條5條，香葉4片]

1. 薯仔、蕃茄去皮切片，粟子我係買啲去咗皮嘅，洗淨就得。

2. 牛肋條切大件，汆水備用。

3. 煲一滾水，倒入所有材料，大火煲半小時，中火煲1小時。

(若用真空煲，先煲20分鐘，放入真空煲內，晚上攞出嚟再煲半小時}

呢個湯我都唔知叫乜名，啲材料好隨意，見到啲粟子好靚，又買咗啲嚟煲，我諗呢個湯可以落香葉，可能香啲喎，又落幾片!HAHAHA............

~蒜茸豆豉煮花甲~

~蒜茸豆豉煮花甲~

[花甲1-2斤，蒜茸2湯匙，豆豉1湯匙，辣椒2隻]

1. 花甲清洗數次，浸水半小時，瀝水備用。

2. 豆豉浸水，取出搓乾，辣椒切粒備用。

3. 起鑊先爆香蒜茸豆豉辣椒，倒入花甲兜勻，加鹽，糖，生抽，酒，胡椒粉拌勻，蓋上蓋煮至花甲全部開口即可上碟。

~腸仔包~

~腸仔包~

[高筋麵粉260g，乾酵母4g，鹽2g，糖15g，溫水165g，蛋12g，牛油10g，蛋黃1隻，腸仔8條]

此份量可做8個腸仔包。師傅話可以加10g奶粉令麵更香奶味!

今次我用咗無鹽牛油，所以又無咁香，下次要用普通牛油!

基本麵糰製作：

1. 先預備上述材料，乾酵母用溫水65g(微暖)開勻，待十分鐘。

可能啲水熱咗少少，師傅話應該微暖就得，如果太熱啲酵母會C喎!
今次搓唔到薄膜可能同呢個步驟有關，下次要留意!

2. 將所有材料倒入大盆中(除了腸仔，蛋黃，牛油，酵母水外)拌勻。

3. 待酵母完全溶解後加入混合粉中，再加入蛋汁，用手在盆內搓成粉糰。

4. 將粉糰移到麵枱上，用手按著麵糰底部，再從下向上推開。

5. 再將粉糰摺回底部，再次從下向上推開。

6. 重覆4、5的步驟，搓至麵糰光滑。

7. 放入牛油再重覆(4、5)的步驟不斷搓揉及摔打麵糰。

8. 當麵糰拉開時，可以見到薄膜即成。

可以見到我係做唔到第8呢個薄膜，但我已搓咗半個鐘!

9. 用手推圓麵糰，黏緊收口。

10. 鋼盆內掃上菜油，放入麵糰，蓋上保鮮紙，以溫度26-30度為準(另可預熱焗爐熄火，放入麵糰發酵)。

11. 想知麵糰發酵夠未，可用手指沾滿高粉，插入麵糰測試。

12. 若麵糰的小洞沒有即時收縮時，即表示第一次發酵完成。

13. 用搥打方法按麵糰三四次，將麵糰的空氣排出。

14. 麵糰移送到枱面作分割。

15. 分割以50g為準，分割後再次滾圓麵糰，不要太大力，小心拉破麵糰的表皮。

16. 將滾圓後的麵糰蓋上保鮮紙，讓麵糰鬆弛10分鍾。

睇下我個個麵糰都唔平均，可以點改善?

17. 將麵糰搓成淚滴型，並擀平麵糰。

所以塊塊都唔同形狀，hahaha..........

18. 將腸仔從一邊捲到另一邊，放在防黏布上作第二次發酵。

咁貴買呢張矽膠布無用武之地，因為我個焗爐太細啦，都係用返防黏布好了!

19. 待麵糰發至兩倍大後，輕手掃上蛋黃。

20. 以180度焗14-18分鐘，以手指試麵包表面有沒有彈性即成。

今晚仲要修改，此篇祇供自己作他日參考之用。

今次我可以整得成(雖然唔多好，但有咗經驗，我相信下次一定好好多)，都要多謝兩個blog友師奶仔同埋嫻人啦!多謝晒!