~開學啦~

九月一日

開學喇!

一早就見啲學生、媽咪、校車穿梭大小街道，

個個都忙著返學，返工!

反而我呢個媽咪，就唔使返工!

一早自己梳洗完，

準備叫醒囡囡，

點知佢自己起咗身喎!

如果日日佢都可以自己起身就好啦!

佢出門口仲叫我慳電唔好開冷氣喎!

見佢咁乖，煮啲好嘢佢食啦!

上次係馬莎買咗啲好得意嘅意粉，

去街巿買餸煮俾佢食先!

朝早去街巿係好享受嘅，

因為樣樣都好新鮮，樣樣都想買!

睇下我買幾多嘢....好辛苦!

~鮮蕃牛肉花花意粉~(可按-食譜)

再加埋碟蒜茸炒BB露荀

呢味好簡單，祇係用蒜茸炒香啲露荀!

因為想趁呢個假期學整麵包，

所以食完晏出咗去荃灣"二德惠"買材料，

又買咗成300蚊呀!

明日明日一定整!

我想學整麵包，

今日本來想整曲奇，

終於無時間!

未來幾日都好忙，有好多嘢要做!

9月4日就到啦......

"家常便飯"

~椒鹽焗小雞腿~(可按~食譜)

因為驚大少又話無肉食，咁多煮多一味，

~泰式甜梅醬雞翼~(可按-食譜)

~蒜香煎豬扒~(可按-食譜)

~梅菜肉餅~

~潮州白菜粉絲煮魚角~

~木瓜花生眉豆雞腳豬骨湯~(可按-食譜)

今日囡囡返學都幾開心，

雖然佢呢班同學大部份都唔識，

但佢收到中二個老友去台灣旅行啲手信，

你地睇下，勁得意呀!

微形字典

好得意呀，仲有個放大鏡添呀!

睇下有幾大，3CM呀!

柔棉體驗~~~~棉花糖

囡囡本來都唔係幾開心，以前中二嗰班有八個同學拆咗出嚟，

大部份都保留原班，佢就係個八個同學其中一人，

所以今年有大半班同學佢唔識，

佢有啲担心!因為有兩個同學係好壞嘅!

我祇有安慰佢話"咁咪可以識多啲新朋友"

一開學又要填好多好多................表!

而家囡囡會自己填咗啲佢識嘅，

但囝囝啋我都傻，全部我填!

當囡囡搵緊出世紙時，

居然俾佢搵到哥哥張幼稚園畢業相，

囝囝六歲個樣呀!

 

中間嗰行中間嗰個呀，今晚我問佢，佢都唔認得!

咁下面呢個又係邊個呀?????

登登登................

就係我啦.....hahaha..........，19XX年架!

亞女仲搵到我張幼稚園畢業証書!

堅架!無花無假!

靚唔靚啫!!!!!!!!!!!

睇下我個樣，都唔好差呀!

 

~椒鹽焗小雞腿~

~椒鹽焗小雞腿~

[小雞腿10隻，椒鹽少許]

1. 雞腿解凍，用薑汁、酒、雞粉、生抽、糖醃2小時。

2. 在焗盆鋪上鍚紙，掃上油，將雞腿排好，均勻地灑上椒鹽。

3. 用200度焗15分鍾，反轉焗另一邊。

4. 最後焗至金黃色即成。

~泰式甜辣雞翼~

~泰式甜辣雞翼~

[雞翼10隻，泰式甜梅醬2湯匙]

1. 將雞翼解凍，抺乾水份，用酒，生抽，糖，雞粉醃2小時。

2. 起鑊用慢火煎熟雞翼，倒入泰式甜辣梅醬，兜勻即成。

**其實呢味好易煮，同煎雞翼煮法一樣，祇是加入上述醬料，雖然佢話甜辣醬，但唔係咁辣!

~蒜香煎豬扒~

~蒜香煎豬扒~

[豬扒4塊，蒜粉少許]

1. 先將豬扒挅鬆，用薑汁、酒、胡椒粉、生抽、糖醃2小時。

2. 煎前豬扒撲上生粉，起鑊用細中火慢慢煎，灑上蒜粉，煎至金黃色。

3. 反煎另一面，同樣灑上蒜粉，煎至金黃色上碟。

**今次係百佳買啲冰鮮豬梅扒，效果幾好喎，無咁'鞋'。

 

~木瓜花生眉豆雞腳豬骨湯~

~木瓜花生眉豆雞腳豬骨湯~

[木瓜一個，紅蘿蔔2個，雞腳8隻，豬骨$30，花生眉豆，果皮1片]

1. 木瓜紅蘿蔔刨皮切段備用。

2. 豬骨同雞腳汆水備用。

3. 花生眉豆果皮洗淨備用。

4. 燒一鍋水，水滾將所有材料倒入煲2-3小時。

~鮮茄牛肉煮花花意粉

~鮮茄牛肉煮花花意粉~

[花花意粉1碗，碎牛肉$15，腸仔2條，蕃茄2個，蘑菇5隻，日式肉醬意粉醬]

1. 花花意粉用水煮7分鐘，焗5分鐘，倒出用凍水沖至凍身，瀝水備用。

2. 碎牛肉用生抽，雞粉，糖，麻油略醃。

3, 蕃茄去皮切粒，腸仔切粒，蘑菇切片汆水備用。

4. 用牛油起鑊爆香腸仔、蕃茄、蘑菇，再加入意粒兜勻。

5. 最後加入意粉醬兜勻即成。

**呢個花花意粉係馬莎買嘅，囡囡話佢好得意咪買嚟試下。

**呢隻意粉醬係吉之島買嘅，佢幾隻味道我都試過，隻隻都好味，我試啲D字頭嘅意粉醬，都係呢隻日本牌子嘅好味!

~孩子長大了~

今日係八月最後一日!

聽日學生都開學啦!

唔知點解，巡blog時睇到好多媽咪，

都好似好開心咁!

因為小朋友開學，佢地會多咗自己嘅時間!

睇到咁，我又有感而發，

我而家想同囝囝講多句嘢都幾難!

小時候你會覺得佢地好癡身好麻煩，

無時無刻要服待佢地，

行開行埋都唔得，

但呢啲時間唔係好耐，十幾年時間，

仔女小時候應該係媽咪最享受嘅時候，

享受佢地同你一齊嘅時間；

享受同佢地一齊去玩嘅時間；

享受同佢地最親密嘅時候；

過後就好似我咁，想同佢地去游下水，

咪攪，

同同學出去好過!

想同佢地睇埸戲，無啦，佢自己會約同學仔去睇!

仔女大咗有自己的朋友，唔再癡住你，

你就會有失落嘅感覺，

好彩，我而仲有個囡囡癡住

，真係要好好享受呢幾年，

再大啲囡囡都會有自己嘅男朋友，

亞媽變得可有可無啦!

星期日例牌都係飲茶!

今日想再整椰汁糕，

但加少少紅豆，咁又變成椰汁紅豆糕。

我都係用mamipohpoh嘅方法，

上完蛋糕堂，今次終於可以打得起啲忌廉啦!

mamipohpoh你返嚟記得睇下呀!

但係今晚睇下，好似失敗咗喎，聽日先知!

今晚又係食茶餐廳，大老爺話去大家樂，

我話過唔去架，啲餸少到C!

叫餸時見到隔離碟"蒸鱔"好正，

係我再三要求下先叫咗一碟!

好正呀，仲有碟燒鴨!

呢個係乜?咪整椰汁紅豆糕淨咗啲紅豆沙囉!

記得細個時，亞媽煲糖水，食淨咗佢會用杯仔裝起，

放係冰葙，咁咪有紅豆冰食囉，

個時細個好鍾意食架，

用個鐵匙刮下刮下咁，

好過癮!