天氣熱最好都係返工
有免費冷氣
放工又係shopping...shopping....shopping
成日行街我都唔悶架!
有得睇又有得買我就開心
通常行完就join埋大老爺去搵食
以前我地去來去去都係個兩間
呢兩個星期我地都係係通菜試新嘢
我係俾佢門口嘅甜品吸引
(我揀咗芒果燉奶)
(
"御品軒"
(啲相真係影得好差，忍耐下啦)
所以今次就決定試吓啦
最衰我個電話影相嘅功能有問題
影咗啲相濛查查咁
不試都俾你地睇吓啦
我唔係好習慣攞住部相機係啲食店影相
我今日攞部電話影相，隔離個pair男女都眼望望
佢地個黃金牛肉炒飯真係幾好食
個牛乳燉奶都幾好唔會好甜
我咁怕甜都覺得唔甜
另外，個牛肮腩好腍，幾好
其他就麻麻地啦...............
下面個係潮洲薯仔蝦餅，仲衰過我係超巿買個啲薯餅
天氣咁熱，日日放工，
最好有部冷氣機跟住我就好啦!哈哈
仲有一日，又係day-off啦，
每星期五天工作嘅制度真係好好用!
以前都唔會得有乜特別，但如果自己放一日假，
咁即係返四放三!爽呀!下個星期一又有節目啦!
今日係星期四，又係煮麵嘅日子。
有個同事要我請佢食蠔仔春卷，但春卷隔夜會腍，唔好食，咁咪應承請佢食蠔仔餅囉。所以今日食麵都整咗蠔仔餅。
呢班'牛魔王'唔使五分鐘已經將碟牛仔扒清碟啦。囝囝仲話好好味呀，佢成日好似個食家咁品評我煮啲嘢架!呢樣好食，個樣唔好食，上次整蠔仔春卷，佢仲俾咗啲意見我，應該個餡應該用乜用乜，下次我會跟佢指示整多次蠔仔春卷。
~滷水牛展~
[急凍牛展2條，樽裝滷水汁一支，冰糖一大粒、薑3片]
1. 牛展解凍，先用滾水灼一灼，瀝水。
2. 一份滷水汁加一份水，以蓋過牛展為準。
3. 用煲仔先用爆一爆薑片，落滷水汁，煮滾加入牛展，大火煮至水滾。
4. 轉中小火加入冰糖，煮1小時，焗半小時(若可留過夜仲會入味啲)。
5. 取出，切片，上碟。
~脆肉瓜煎牛仔扒~
[安格斯牛仔扒一盒，脆肉瓜一個，蒜片2粒]
1. 牛仔扒解凍，切大粒，瀝水，用雞粉，胡椒粉略醃。
3. 用蒜片起鑊，先爆牛仔粒，記得先好一面，灑上蒜鹽，再反另一面，煎至兩面金黃有少燶，撈起瀝油(牛仔扒脂肪多，會出好多油)。
4. 再用少許油起鑊，落脆肉瓜，爆至熟，將牛仔粒回鑊，拌勻，上碟。
~蠔仔餅~
[蠔仔1斤，蛋3隻，薯粉3湯匙，生粉2茶匙，芫茜2棵，蔥少許]
1. 先將蠔仔用生粉、鹽略醃，再用水洗淨，用滾水灼熟，瀝水。
2. 芫茜、蔥切粒。
3. 蛋拂勻，加入薯粉同生粉拌勻，加1茶鹽，再加入灼好的蠔仔。
4. 用平底鑊落少許油，倒入一半蛋料，慢火慢慢煎，再反另一面，煎至兩面燶燶地，上碟，食時蘸魚露。
今日食上海麵，不過今次試呢種太粗啦，呢隻可能做上海粗炒會好啲，下次都係買番之前食個種好啲。
我可能傻傻地架!無人好似我咁，越忙越精神，
而家我完全無事，仲好有幹勁添!
呢兩個星期拍擋放咗假
要做埋佢個份，又咁啱呢排好多嘢做
日日做到無停手!
仲有兩日，就可以放假啦!
噚日整嗰啲餸唔係好啱兩隻馬騮食，
整番啲佢地嘅餸!
亞妹仲offer咗粟米湯，我仲整咗蒜茸豆豉蒸排骨。
~咖喱薯仔炆雞翼~
[楊協成咖喱醬一罐，雞翼十隻，薯仔2個，甘筍1個，洋蔥(小)1個]
1. 雞翼解凍，瀝水，用雞粉，燒油，薑汁，生油，糖醃半小時。
2. 薯仔、甘筍、洋蔥切大件，備用。
3. 用蒜茸起油鑊，先落雞翼爆一爆先。
4. 跟住落埋薯仔等材料，爆至薯仔表面有少許燶，落咖喱汁，再加水，蓋過所有材料為準，炆至汁收至剩少許，上碟。
~帶子炒大芥蘭~
[大芥蘭2棵，急凍帶子10粒，罐頭磨菇片]
**其實我唔係知呢隻菜個名，不過就好好食，好甜好脆囉**
1. 帶子解凍，瀝水，用少許胡椒粉略醃。
2. 大芥蘭刨皮，切片，燒熱水灼一灼，撈起。
3. 用蒜片起油鑊，落帶子爆香加少許燒酒，鹽，爆至熟。
4. 將灼好之芥蘭片、磨菇片同帶子一起爆熟，上碟。
實肥死啦!
