11~Mar~2011(五)
我係上海之第二天
返嚟盡快load相俾你地睇
介紹一款西湯
真係無乜幾何
煮西湯都係第一次
通常買罐頭湯就算
今次首次嘗試
搵到呢個食譜同大家分享下
【蜆肉忌廉薯仔湯】
[材料]
薯仔2個，洋葱1/4個，蒜茸少許，清雞湯70ml，牛奶250ml，蜆肉100g
[做法]
1.薯仔去皮切粒，洋葱切粒。
2.起鑊先加入蒜茸爆香洋葱及薯仔，加入雞湯煮15-20分鐘至薯仔變腍。
3.將所有材料放入攪拌機打滑。
4.再起鑊爆香蜆肉，加入少許胡椒粉及鹽至乾身。
5.將己打滑之湯料放入鍋中，煮滾，加入牛奶及蜆肉再煮滾，加入鹽及胡椒粉調味即成。
~喜歡嘅可灑上黑椒粒食用~
自己整真係好味過罐頭
以後都會多點嘗試西湯!!!
10~Mar~2011(四)
Hi.....)))
現在我已經係上海
嘆緊二人世界喇
會係上海玩到13號先返香港
到時會逐一回覆你地嘅留言
行程四日三夜
(10.3.2011-13.3.2011)
至於仔仔囡囡
就麻煩媽咪幫下手睇住
唔該晒媽咪!
除咗結婚時度蜜月
真係未試過淨係兩公婆去旅行
都事隔廿幾年
呢次算算再度蜜月......嘻嘻
大家咪以為我掛住去玩
我會比心機
用部新機同新鏡頭影多啲靚相俾你地欣賞
希望天公做美啦
嚟緊幾日
呢度唔會停架
會有好幾個食譜介紹俾大家
有興超嘅
記得入嚟睇下啦喂)))
最好留低幾隻字先好走........哈哈哈
呢次旅程大致上都係
食食食
影影影
行行行
希望玩過痛快
13號啦喂....咁多位!
9~Mar~2011(三)
見到呢個譜已經好想試
睇下啲步驟好似好複雜
但本身好鍾意食呢啲煙煙un un嘅東西
買嘅又太甜
的起心肝試一試
雖然做成咗
味道又唔錯
但製成品同最後一幅圖差好遠咁
希望下次會做得好啲
***
和菓子
【卡士達醬士多啤梨大福】
[材料]
[8~10個]
[覆盆子卡士達醬]
牛奶200ml，蛋黃3個，砂糖40g(我減至25g)，麵粉30g，覆盆子Raspberry50g(急凍)，君度橙酒少許
[大福皮]
糯米粉150g，砂糖75g(我減至50g)，水200ml
草莓8~10個
[做法]
[做覆蓋子卡士達醬]
1. 覆盆子隔溫水加熱，用攪拌器打成茸。
2. 蛋黃加砂糖混合好後，放入小煲中用小火加熱，一路煮一路攪動，至微暖便可以熄火，繼續打發至變白後加入覆盆子茸拌好。
3.再 加入麵粉攪拌好，確認全部混合好。
4. 將牛奶加熱至80度(煲邊起泡)，再加入麵粉糊中拌勻， 攪拌好後放回鍋中。
5.以中火用木匙不斷攪動以色黏底，至出泡泡後熄火。
6.過篩(口感比較滑)，蓋上保鮮紙待冷卻。
7.預備數張保鮮紙(大約6x6寸)，將保鮮膜放在枱面再放一點的卡士達醬，用另一張保鮮膜放在上面壓扁。
8.拿掉上面保鮮紙，中間放士多啤梨，用下面的保鮮紙把草莓包起來，包好的士多啤卡士達醬，放入冰塊水中，讓卡士達醬快速凝固。
[做大福皮]
9.將大褔三種材料全部混合好。
10.用保鮮紙蓋起後，用微波爐叮約2分鐘。
11.取出用匙攪拌一下，再回微波爐，大概叮30秒至完全變白即可。
12.用刮刀攪拌到表面稍微有光澤的樣子。(口感才會煙煙unun)
13.用濕的湯匙挖一點放在糕粉(或太白粉)上面沾粉後壓變，弄成圓形。
17.把冰好的覆盆子士多啤包起來，掃去表面多餘的粉即可。
點解同人地個樣差咁遠嘅??????
8~Mar~2011(二)
一路以來
我都好用心去諗
多點雞翼嘅煮法
因為仔仔超愛雞翼
做亞媽嘅一定盡心盡力
今次又試下用呢個汁去煮雞翼
呢個汁好多人都試過煮排骨
你地又試下用嚟煮下雞翼吖
【數字雞翼】
[材料]
雞翼15隻，蒜茸1茶匙，薑茸1茶匙
[調味汁]
紹酒1湯匙，鎮江醋2湯匙，糖3湯匙，醬油(或生抽及老抽)4湯匙，水5湯匙
[材料]
1.雞翼解凍，汆水備用。
2.起鑊爆香蒜茸及薑茸，加入雞翼兜炒一會。
3.加入調味兜均，滾起調小火慢慢煮至汁收即成。
(喜歡的可留多點汁撈飯)
7~Mar~2011(一)
有次整理食譜
發現有呢個譜
即時想買個南瓜試
不過原來呢排綠色呢種南瓜唔啱時候
所以係街巿都好少見
不過終於都俾我搵到一檔有得買
係大型超巿買成4-50蚊一個
呢個祇係$18咋
大約有6-7"直徑
【南瓜布甸】
[材料]
日本小型南瓜一個(大約直徑6-7寸)，牛奶300ml(我改用無糖豆漿)，糖40g，蛋黃2隻，魚膠粉7g(約2片半)
[做法]
1.南瓜放入滾水中灼5分鐘(目的令南瓜表皮軟啲)。
2.取出切去頂部小許，挖去南瓜囊和核，原個隔水蒸15-20分鐘至熟即可，取出放涼。
3.魚膠片剪細塊用冰水浸軟，隔去水份。
4.豆漿加入糖加熱至80度，放入魚膠片拌溶離火。
5.蛋黃略拂勻，加入豆漿中快手拌勻，過篩。
6.將豆漿小心注入南瓜中至滿，蓋上南瓜皮，放入雪柜冷藏至凝固。
7.食用時從雪柜取出切件享用。
[小貼士]
~ 蒸南瓜時間要控制得好好，過火個南瓜會太腍，做出嚟會唔靚!
~ 南瓜一定要好小心咁清理晒裏面啲囊及核!
~ 南瓜蒸嘅時間祇可作參考，因為大小不同厚薄都有影響，蒸至15分鐘要檢視下ok未!
~ 呢個南瓜甜品要做得甜少少，因為南瓜本身無乜味，太淡會影響無咁好味!
~ 要記得倒滿啲，唔好好似我咁，做出嚟唔靚架!
好彩有部份都係幾飽滿
以後呢個甜品唔使去泰國菜館食lu!
世情看來千千結
解開只是綫一條
6~Mar~2011(日)
好耐之前
桂格contact我
話有啲產品送俾我試食
之後好耐無消息
點知
突然上星期收兩大包格片
仲有好詳細嘅食譜介紹
好多謝Miss Wong嘅安排
其實平時我都有買即沖麥片食架
貪佢方便又飽肚
對健康好有益
呢隻大麥片就未試過啦
搵日試下用嚟做下餸菜
唔知work唔work呢?
各位
未投票嘅朋友仔記得入去投票呀)))))))))
「譜出健康新滋味，李錦記Blogger大激鬥」
http://blogger.lkk.com/index.php
我的參賽食譜己刋發係李錦記網頁
請投我一票
【蠔油竹笙釀墨魚膠】
5~Mar~2011(六)
潛咗水兩日
今日都係時候蒲頭
有朋友生日
我呢位歡樂小姐
最樂意為朋友做生日蛋糕
(嘻嘻....又有白老鼠啦)
不過因為在心情極惡劣的情況下開工
所以做出個極醜陋的蛋糕
希望朋友仔唔好介意
***
首次用呢個組合
唔知好唔好味
不過因為一時預計唔到
諗住加啲朱古力脆脆
等個cake多點口感
點知無諗到佢會浮晒出嚟
個蛋糕變咗豆皮咁
好肉酸
*呢個食譜尚未成功，要待再試驗一次先確定*
2011~CAKE 9
【椰香朱古力慕絲蛋糕】
[餅底]
餅碎70g，牛油溶液30g
[朱古力慕絲材料]
蛋黃2隻、砂糖40g、牛奶80g、黑朱古力112g、魚膠粉2g(建議用6g)，淡忌廉160g
[做法]
1.蛋黃加入砂糖略拌勻。
2.用小鍋將牛奶加温至70C離火，加入蛋汁內快速攪動(以免蛋汁過熟)。
3.將小鍋放回爐中，以小火慢慢加熱，用打蛋器不停攪動鍋底慢煮，直至出現明顯劃痕的濃稠度為止，熄火備用。
4.將切細的朱古力碎片放入盆中，淡忌廉(100g)煮熱，加入朱古力碎拌至完全溶解。
5.用冰水浸軟魚膠片座溶，再加入朱古力糊中拌勻。
6.將蛋糊分3-4次加入朱古力糊中拌勻，每次確保完全融合先再加另一次蛋汁。
7.淡忌廉(140g)打發至七成。
8.將淡忌廉分兩次拌入朱古力糊中攪拌均勻。
【椰汁糕材料】
淡忌廉125g，椰漿200g，糖60杯，水3/4杯，魚膠粉8g]
[做法] 1.將淡忌廉先打至企身，魚膠片剪碎用冰水浸軟。 2.用細煲燒滾水，加入砂糖同魚膠片混合料倒入離火 3.再加入椰漿拌勻。 4.將淡忌廉加入椰漿糊中拌勻備用。 [組合] 1.蛋糕模放上蛋糕咭紙，用錫紙圍邊。 2.餅碎加入牛油溶液拌勻，倒入蛋糕模中壓平。 3.倒入朱古力慕絲，喜歡嘅加入朱古力脆脆入朱古力漿中。 (千祈唔好好似我咁加係面呀) 4.放入雪柜冷2小時或冰箱30分鐘。 5.取出再加入椰汁糕材料，再放回雪柜冷藏三小時。 6.取出脫模做餅面裝。 睇下個蛋糕幾肉酸 啲朱古力脆脆浮晒出嚟 去到食嘅時候仲失敗 無預計下邊個朱古力慕絲唔夠魚膠 承托唔到上邊嘅椰汁慕絲 上邊的椰汁慕絲沖晒入朱古力慕絲裏面 超失敗 去到仲成個都裂晒 真係對壽星女唔住 佢地仲好好咁話好味 真係千個唔好意思 我會用呢個譜再試一次 因為覺得呢個味道唔錯 無乜心機好求其咁放幾粒珠算啦
