0701~九龍城午聚!!!

1~July~2009(三)

今日係公眾假期

32C

天晴，天氣好熱太陽好猛烈啦!!!

0701~九龍城午聚

今次Jasmine約咗主席(一家四口)，Oyin媽&Oyin，仲有我!

地點係九龍城巿政大樓泰苑小食

我都係度食咗幾次

同Jasmine就係度食咗兩次

次次都係咁抵!!!

睇下我地叫咗成枱嘢仲有7、8杯冰冰都係$630!

今次亞妹玩影相呀

次次都叫到食唔晒

下次都要算清楚唔好亂叫

Oyin媽係第一次嚟呢度食

佢話好抵喎!

睇下我地叫啲乜

冬蔭公湯一鍋

泰式炒通菜，泰式無骨鳯瓜

泰式炒金邊粉，炸蝦餅

春卷，咸魚雞絲炒飯

炭燒豬頸肉，泰式燒雞

香茅雞翼

青木瓜絲沙律~都好辣架!

仲叫咗兩碗湯河啲細路食

天氣太熱啦，啲芒果冰好似無上次咁好味

我覺得唔夠凍

食咗咁多辣嘢，我都要叫多罐汽水先頂得順

跟住就係過皇上皇買嘢

主席話要做乖乖喎.............

食番包五香乖乖先!

又過咗去買謝寧曲奇

主席好鍾意食呢隻蝴蝶酥

一盒$88

再帶Jasmine去買爆汁牛肉餅

我又買番三個食下$30

返到屋企個皮唔脆，但個肉汁好正

好好味!

跟住Ronald話要食糖水

我地又去咗"口甜舌滑"

睇下呢兩位靚仔幾多玩具

我要咗呢個椰汁珍珠紅豆涼粉冰

好正，唔係好甜

仲令我諗番起細個時

係街邊食嗰啲冰冰嘅感覺!

佢地個個都係芒果怪呀!

Jasmine食呢個榴槤飄香好正

咁就開開心心咁過咗一日

不過天氣好熱企係條街真係燒著咁滯!

 

 

 

 

執嘢!!!

30~June~2009(二)

天陰間中有陽光

天氣好熱有成32C

趁新拍擋未嚟之前

放得假就放啦

正因為想少見啲小人

放假係屋企執下屋

自從學識整嘢之後

間屋亂到C

成日都俾大老爺投訴

瞓醒

先知大老爺都放咗假

(佢係唔會事先同我講佢放假架)

咪自己去搵食(早餐)囉

好鬼怕佢執嘢架

一入廚房執嘢

又話我好放個攪拌器入個碗柜度

大佬呀，我放得咁好又俾佢話要放番入箱

唔通我榨少少嘢，要千辛萬苦咁係個箱度攞出嚟咩

放咗入箱幾年都無攞過出嚟啦

我而家收得好好地又要俾佢話

係佢自己執唔番啲碗入去之麻

執唔到咪我執囉

使唔使話人呀!

真係火都嚟埋呀

無無謂謂又俾佢話

我同佢講佢買四個柜番放佢啲DVD

我都無話佢

我覺得係佢嘅自由

我知我買咗好多嘢

成屋都係

但，呢個係我嘅興趣

假期又無街去

整下嘢又驚俾佢話我

咁唔通我日日係度瞓晏覺咩

點解佢成屋都係CD又可以買個柜呀

又唔見佢買個柜俾我放晒入去咪得囉

攪到我咁大壓力

時時刻刻都驚俾佢話我

今朝執嘢先執到件新衫

俾佢亂咁塞咗入個袋度呀

佢就係咁架啦

唔理人地啲乜嘢

佢鍾意塞去邊就塞去邊

真係俾佢激C

佢成地都係汽水又得喎!

放假都係好忙

因為想學整嗰list太長啦

今日又揀咗樣嘢試整

晏晝仲出咗永安搵個啫喱模

終於又忙到夜晚

【黑啤牛肋條】~(食譜按此)

黑啤唔係淨係可以攞嚟飲

原來仲可以用嚟炆嘢

食落好西式!

【椒鹽雞翼】~(食譜按此)

噚日整咗個椒鹽骨

仔仔就問我點解唔整雞翼喎

好有order就梗係接啦!

【合掌瓜煮蝦乾】~(食譜按此)

合掌瓜配蝦係最夾

無買到新鮮蝦用蝦乾煮都好好味!

【煎鯖魚】

因為個焗爐用緊

所以就咁煎已經好好味

 

 

 

 

 

 

 

【黑啤牛肋條】

【黑啤牛肋條】

[材料]

黑啤1支(細)，牛肋條1斤，新薯10粒，紅蘿蔔2條，香葉3片，茄膏2湯匙，牛肉汁1湯匙，百里香少許，黑胡椒粒少許

[做法]

(1) 牛肋條汆水，過冷河，切粗粒瀝乾水份。

(2) 薯仔刨皮，紅蘿蔔刨皮切件。

(3) 起油鑊，下薯仔，紅蘿蔔，茄膏，黑胡椒粒，加入牛肋條兜勻。

(4) 加入黑啤，水或上湯1碗，糖1湯匙冚蓋炆45分鐘，熄火(不可開蓋)焗1小時，再開火炆15分鐘，再焗半小時，開火煮滾即可。

【合掌瓜煮蝦乾】

【合掌瓜煮蝦乾】

[材料]

合掌瓜2個，蝦乾半碗，蒜頭3粒

[做法]

(1) 合掌瓜刨皮，用小刀去掉餘下之瓜皮，切半去核，再切大件。

(2) 蝦乾洗乾，略浸一會。

(3) 起鑊下蒜頭爆香，加入合掌瓜兜炒一會。

(4) 加入1碗水、鹽，糖和蝦乾冚蓋煮至瓜腍即可。

【椒鹽雞翼】

【椒鹽雞翼】

[材料]

雞翼10隻，椒鹽適量

~~~~~~~~~~~~~~~~~~~~~~~~~~~~

[做法]

(1) 雞翼解凍，洗淨瀝乾水份，加入酒，生抽，糖，麻油，椒鹽醃1小時。

(2) 起油鑊，放入雞翼炸至熟倒去多餘油份。

(3) 灑上椒鹽兜勻即成。