係咪放假架!!!

5~May~2009(二)

實在太攰

朝早起身成身好似散晒

所以今日請咗假

諗住係屋企好好休息下

噚晚已經同奶奶講咗今晚唔去

請假除咗休息之外

仲想煮番餐住家餸俾仔仔囡囡食

煲番個靚湯潤一潤

而家啲細菌咁犀利

要煲啲湯水保健下

同平時一樣咁早起

叫咗囡囡返學

就同大老爺一齊去食早餐

返屋企坐一陣又要去街巿

無去咗個幾星期

連買開嗰檔菜檔都唔知搬咗去邊

個街巿重新裝潢過

兜咗幾個圈

終於買咗兩大袋

淨係生果都買咗四款

呢個幾星期除咗無啖好食之外

連水果都食少咗

見到啲青椒$5有咁多，又好想食釀青椒

買到成枱都係餸

計下計下買咗6樣餸

所以有啲要留番聽日

今晚一於煮番啲好餸嘆下先

但食好餸嘅背後

就係做咗成日呢!

做到都無停手

又忍唔住做埋麵包添!

是日晚餐

~梅菜肉餅蒸魚肚~(食譜按此)

呢個係見噹媽用豆泡墊底，而我係想清貨用咗魚肚

~椰汁芋頭雞~(食譜按此)

我唔喜歡用成隻雞，今次用咗兩隻雞脾架6隻雞翼

今日呢個芋頭買得唔靚，所以唔好食，都唔粉嘅!

~煎釀青椒~(食譜按此)

~蒜茸炒莧菜~

菜係唔可以少的

保健靚湯

~沙參玉竹淮山茨實蓮子無花果螺片豬展湯~(食譜按此)

 

【梅菜肉餅蒸魚肚】

【梅菜肉餅蒸魚肚】

[材料]

豬肉$15，甜梅菜$5，乾魚肚8件

[做法]

(1) 魚肚浸軟搓乾水份備用。

(2) 起鑊以1碗雞湯略煮魚肚約2分鐘。

(3) 豬肉挅碎，加入鹽，生抽，生粉，糖，水，胡椒粉，麻油攪勻備用。

(4) 梅菜浸水15分鐘，撈起搓乾水，切粒粒，再次搓乾水份，加入豬肉碎中攪勻。

(5) 用碟先鋪好魚肚，在上面再鋪上梅菜豬肉，用大火蒸15分鐘。

【椰汁芋頭雞】

【椰汁芋頭雞】

[材料]

芋頭1個，雞脾2隻，細椰汁1罐

~~~~~~~~~~~~~~~~~~~~~~~~~~~~~~~~~~~~

[做法]

(1) 雞脾洗淨斬大件，用雞粉，胡椒粉，酒，鹽，生抽醃半小時。

(2) 芋頭刨皮，切厚件。

(3) 起鑊先爆雞件，至微微金黃色，加入芋頭兜勻，加水蓋上蓋煮至芋頭熟。

(4) 倒入椰汁兜勻即成。

【煎釀青椒】

【煎釀青椒】

[材料]

尖青椒8隻，無調味魚肉$10

葱粒1湯匙，蒜茸豆豉1湯匙

[做法]

(1) 尖青椒洗淨，切半瀝水備用。

(2) 魚肉加入魚露、生抽、鹽、糖、生粉、胡椒粉、葱粒攪拌勻，用手將魚肉撻至起膠，放入雪柜雪半小時。

(3) 在青椒內搽上生粉﹐釀上魚肉。

(4) 用易潔鑊起鑊，放入釀了魚肉之青椒，魚肉面向下。

(5) 煎至魚肉金黃色，反轉煎一煎青椒面撈起。

(6) 用1湯匙蠔油，1茶糖，1茶生粉，2湯匙水攪勻。

(7) 起鑊先爆香蒜茸豆豉，加入蠔油水埋芡淋上青椒面即可。

 

【沙參玉竹淮山茨實蓮子無花果螺片豬展湯】

【沙參玉竹淮山茨實蓮子無花果紅蘿蔔螺片豬展湯】

[材料]

沙參、玉竹、淮山、次實、蓮子、無花果、乾螺片、豬展、果皮，紅蘿蔔

[做法]

(1) 果皮浸水，乾螺片浸水。

(2) 豬展汆水備用，紅蘿蔔刨皮切大件。

(3) 所有材料洗淨備用。

(4) 燒滾一鍋水，放入所有材料煲半小時大火，轉細煲2小時加鹽調味即成。

超攰!!!

4~May~2009(一)

天陰有雨

一早返工已經落雨啦!

放咗幾日假

都無休息過

奶奶仲未出院

幾乎日日都去探佢

仲要幫佢抹身

又要企係度個幾兩個鐘

咪話唔攰!!!!!!

噚日又帶媽咪爹地去睇傢俬

行咗成個下晏

好鬼攰

但時間上又唔夠返屋企

咁又係街hea咗兩粒鐘

未夠六點已經去到醫院

入到病房又鍡奶奶食飯

食完飯又幫佢抹身

好彩今次有姑仔幫手

(都唔明，大老爺係咪對我太有信心，定係佢根本無担心過我，我同奶奶抹咗兩次身(佢好肥架)

佢都無問過我掂唔掂，反而2號我去唔到，佢就担心姑仔一個人攪唔攪得掂?)

大老爺.............你老婆唔係超人呀，都會攰架

你關心下我好唔好???

之後企到八點先走

走嘅時候對腳好似唔係自己咁

唉................真係年紀大啦!

今日開始返工

個人仲好眼瞓好攰

晏晝又要落灣仔買生果麵包

今晚攞去奶奶度

囡囡

噚晚話爸爸咪係灣仔返工?

怕唔怕豬流感架?，女仔都係多嘢諗啲!

唔記得邊個blog友

提過呢間係荃灣嘅醬油鋪

噚日係荃灣街巿落車

就見到呢間鋪頭

就買咗兩三樽醬試下

柱候醬我多數用嚟炆嘢，雪柜一定有樽架

呢個唔知會唔會好過皇上皇啲呢?

真係自己搵自己笨

攞住呢三樽嘢跑咗成日!