1~Feb~2009(日)
年初七
~人日~
大家生日快樂
祝大家
人日 即係話人人生日嘅日子 聽日要開工啦 真係要收拾心情投入工作 因為由聽日開始 會一直做三月中先可以放假 下星期六開始要開OT 即係話 每日都要做到九點幾十點先返屋企 咁有十幾日都唔使煮飯啦 睇嚟大老爺又要出街食 因為佢都唔鍾意我叫媽子返嚟煮俾佢食 所以今次我都無諗過叫媽子幫手 次次話叫大老爺都話唔使啦唔使啦 佢最怕應酬人架 晏晝出咗去呢度飲茶 係呀，又係飲茶呀 都唔明而家經濟唔好 啲酒樓仲夠胆年初七都仲加價 唔得之十一點幾入到去都無一半人 而家好多酒樓新春期間開巿 都唔敢加價啦 今晚會返媽子度拜年 應該會好好餸 遲到年初七都好 起碼啲餸菜無咁貴 又多嘢買 一返到去梗係唔少得食啲年糕先啦 媽子好餸 ~咸魚肉餅~ ~炸雞翼~ 仲有支靚酒喎 同公公婆婆影番張相先牛年進步、萬事如意心想事成、身體健康財源廣進、開開心心大家記得同自己慶祝下啦所以無謂勉強!!!我可以撓埋隻手有得食lu
【兔仔棉花糖】
材料：
蛋白 4個
砂糖 150g~200g
魚膠粉 50g/ 魚膠片 10片
大滾水 300g
椰絲1包
士多啤梨果醬 適量(用嚟做眼睛)
做法：
1. 魚膠粉倒入細煲中，加入1/3滾水攪拌至溶化
2. 加入餘下之熱水，再加入砂糖攪拌
3. 將糖水煮至蒸發1/4水份熄火待稍涼(可座凍水)
4. 蛋白打至起泡，分三次加入溫熱糖漿打發(每次都要徹底咁打起啲蛋白，可座凍水打)。
5. 將蛋白糖漿倒入平底盤中於室溫稍為冷卻(注意不要冷卻至定型，約數分鐘)。
6. 將冷卻了的蛋白糊放入擠花袋，用12mm以上擠咀於不沾紙上擠出小兔狀。
7. 放入雪柜冷卻至定型(約半小時)
8. 定型後滾上椰絲，以果醬點上眼睛即成。
31~Jan~2009(六)
年初六
聽日會返媽子度拜年啦
好高興架，成家人一齊食餐飯
今次要等到年初七
係因為要等細佬去完旅行返嚟
媽子等呢餐等到頸都長啦
今朝樓下商場有舞獅表演
即刻攞部相機出嚟影低先
大家欣賞下
咁樣先有新年氣氛嘛
記得細個住十六層啲公屋
一到新年就好多舞獅團
上樓舞獅收利是
每家每戶都打開門迎接
做細路梗係好開心啦
大鑼大鼓咁又有舞獅睇
而家嘅香港已經好少有得啦
都係係啲商場先有舞獅睇!
成日諗番細個過年真係好有氣氛
仲有啲道友會攞住啲紅紙
逐家逐戶去討利是
話接財神喎
我話佢地接咗財神就真
今日無乜嘢做，本來都想瞓晏啲
但年紀大瞓唔着
咪起身食早餐，買報紙
晏晝又係
.
.
.
.
.
.
.
.
.
飲茶囉
大老爺鍾意
隻棉花兔仔好得意，唔知幾時識整呢?
今晚會出陶大行
順便係嗰度搵食，又唔使煮啦!
