今日天氣
逢星期日都係飲茶，十幾年都係咁架，
我地兩公婆都係幾悶嘅人!
呢個就係我地一定食嘅~蠔仔銀針粉~啦，
我都煮過，你地可以click入去睇番。
~芒果pancake~諗諗下呢個自己都應該整喎!
~泰式蝦春卷~
細路至愛~炸蝦角~
美味嘅~沙薑雞腳~
又唔講得出嚟，
真係悶死人啦!
已經差不多兩年無去旅行啦，
成日都話無錢，
本來佢曾經講過暑假去旅行，
當時心中暗自歡喜，
仲諗住邊度都好啦，
總之一家去邊都咁開心嘅，
點知早前問咗佢一句'你又話去旅行?'
俾佢鬧到無晒癮，
又唔係我提出嘅，係你話之嗎!
唔去咪唔去囉，好似我硬要佢去咁，
我又唔相信去澳門都無錢呀!
所以今個暑假真係好!
大陸短線都好呀，不過見過鬼仲唔怕黑咩!
邊敢出聲呀，聽到人地去旅行咪鬼咁羨慕囉!
我的減肥日誌
第13日：XX8 lbs(仲肥咗1磅)
早餐：無得食(個個星期日都係咁，早午餐一齊食)
午餐：燒賣1粒，牛肉1粒，春卷1條，沙薑雞腳2隻，蠔仔銀針粉1小碗，小籠包1粒。
晚餐：豬扒炒公仔麵1碟，蒜茸焗青口2隻，可樂1杯。
逢星期日我都會超晒標架!
今日天氣
依然係咁熱
噚日半夜，聽到房外好嘈雜，
原來，囡囡嘔吐大作，成張床都係!
大老爺梗係話佢唔落床去嘔啦，
因為囡囡張床係上格床嚟，
清潔起上嚟都好複雜，
最慘佢嘔係牆邊(下面有櫃)好難抺，
要搬個櫃出嚟先可以抺到，
唔知係咪噚日食咗啲唔乾淨嘅魚生?
因為晚飯佢地係姑媽度食住家飯，
應該無問題架!
三個人淨係得佢有問題。
好在今朝都無乜事，
平時佢係咁架
今日就瞓咗係梳化!
胃口又唔多好!
見到囡囡咁樣，真係心痛!
咁多年我都係呢個"煮海"浮沈，
由中學已經要幫亞媽煮飯，
因為媽子返工，我咪負責煮啲簡單嘅餸菜俾細佬妹食。
我係大家姐嚟架!返學都無家政呢科，
所有都係"家庭中學"度學，
而家囡囡都家政學，但係就連行埋個爐度都怕熱，
蛋都唔識煎一隻!
我一路以嚟都有買烹飪書嘅習慣，
因為成日都無乜靈感煮乜餸，
又想俾啲新煮意佢地食，
所以所有烹飪書都係我嘅"師傅"，
我仲有剪報嘅習慣，
剪剪埋都有幾本烹飪書!
嗜好!我仲有一個嗜好，遲啲再講，等我儲好啲資料先!
因為想清咗啲存貨，早前係大埔買嗰啲"清心丸"
今日煮咗個糖水，個名好長架!
~腐竹白果雞蛋清心丸糖水~
仲有個
~朱古力奶凍~
因為唔記得用匙抺走啲泡，所以咁肉酸..........
我的減肥日誌
第11日︰唔敢上磅
早餐：兩塊白麵包+無糖低脂奶茶。
午餐：肉飯蒸飯+雲吞4粒+凍奶茶少甜。
下午茶：清心丸糖水。
晚餐：大家樂。
大家唔樂!一個好唔好嘅經驗，我食嘅係一個套餐叫"無錫排骨/麻婆豆腐飯"$33。
一攞出嚟我個口成個O字咁呀，兩碟餸，無錫排骨得無舊，我問個經理"得兩舊呀"，佢即刻攞返去出菜處叫入面加多舊，但入面拒絕咁做，仲話我個兩舊大舊所以得兩舊喎!個兩舊唔記影相，一舊2"X2"，一舊1"半X1"，你話大唔大呀!
麻婆豆腐就真係得豆腐，我好辛苦先係碟豆腐度攞到一粒豬肉，記住係一粒呀!
知我要減肥呀，淨係可以食二兩肉?成33蚊得個兩啖肉。
大奸商!加咗價仲少咗餸，28蚊個四寶仲多肉過我個碟!
佢地仲好似好好心咁，其實驚我係度嘈，話加啲豆腐俾我喎，咁難食嘅豆腐仲加俾我做乜!
我以後如果有選擇我都唔會再去大家樂食晚餐!
~腐竹白果雞蛋清心丸糖水~
[腐竹4塊，雞蛋6隻，白果20粒，冰糖2大舊，清心丸半斤]
1. 凍水落腐竹(搣碎)、冰糖，煮半小時。
2. 清心丸洗淨面啲粉，瀝水。
3. 白果除硬殼，輕輕壓扁。
4. 雞蛋2隻拂勻，4隻留用。
5. 腐竹煮滾半小時後，落白果，4隻蛋直接打入糖水中。
6. 再煮半小時，加入清心丸煮5分鐘，再加入蛋汁熄火即成。
期待咗好耐啦!
自從知道有呢本書會出版，
真係日日經過報攤、書局都一定睇一睇!
今晚又係咁，經過旺角馬x記又入咗去，
我係呢度買咗好多本書，多數都係烹飪書，
睇一睇新書版，哇!有啦有啦!
即刻買番本，一路等大老爺一路睇!
Mommy Deareat!Mommy Dearest你入咗推介呀!
你睇下，我尊登影係你睇，我都好高興見到你個blog咁受歡迎呀!
YEAH!YEAH!YEAH!
返到屋企即刻影咗post上嚟!
一路睇一路食好香嘅番石榴!
我的減肥日誌
第十日：
早餐：
午餐：鰻魚手卷，三文魚、螺、燒三文魚、熟帶子、北奇貝壽司。
下午茶：吞拿魚酥1件，椰汁糕1小件。
晚餐：墨魚丸3粒，魚札3件，魚餃2件，河粉1碗，生菜全走1碟。
