~雞蛋布甸~
之前係九龍城皇上皇買咗一包"雞蛋布甸粉"
終於係今日整咗佢la
包裝上已經好清楚寫咗點做，無難度架!
淨係煲滾煲水，熄火，加入雞蛋布甸粉，拌勻。
最好盡快倒入膠杯中，因為好快會凝固架!
食過覺得個味道幾好，不過就實咗啲，我覺得如果加啲牛奶會仲好啲!
2008年7月6日星期日
~酸子薑~
今日大老爺一早又去咗跑步啦
我呢個難瞓豬都唔識起身
去完飲茶又去咗皇上皇買嘢
今次買番一包雞蛋布甸再整一次改良版先
之前放假可以一早去街買餸
見到啲樣樣都咁新鮮，同我放工嘅時候
真係天淵之別呀
原來一早街巿啲嘢又平又新鮮
仲有好多選擇，攪到我呢樣又想買嗰樣又想買
嗰時見到啲子薑好新鮮
已經諗起酸子薑同子薑炒牛肉
想起都流晒口水
我好鍾意食酸子薑架，去食壽司我一定食好多!
今日終於輪到整子薑啦
有一樣嘢好激氣
就係係街巿嘅雜貨買咗支變壞咗嘅白醋
今我損失十幾蚊，仲要再去買過兩支嚟
因為我買完嘢沖咗涼
咁咪叫少少爺幫我去超巿買囉
點知十幾歲咁大個仔都搵唔到乜嘢係白醋..............
點解而家啲細路咁架
終於咪出發去奶奶度自己去買囉
但見到大陸啲白醋都怕怕
都係買番兩亨氏白醋
價錢雙倍架!
就係呢兩支醋出事啦!
~酸子薑~
[三斤子薑，白醋(米醋)1枝，白糖1磅]
1. 先將啲白醋煮熱(唔需要滾)，一路煮一路落糖，一路攪溶啲糖，要試味覺得夠甜就熄火，待涼。(如果醋熱會令到啲子薑無咁爽架)
2. 將啲子薑用刀仔刮咗啲皮，切片，用鹽醃到變軟軟地，用手搓乾啲水份。
3. 用玻璃樽放入子薑，再倒入甜醋。
呢樽係自己嘅，會自己食同攞嚟煮牛肉啦!
P.S. 今次買咗3斤子薑，不過切完會得番2斤左右，因為我無要到啲老嘅子薑，當你切嘅時候，你就會知邊啲係老，多根嗰啲就係老。
~囡囡~糖水~
今晚又係返奶奶度食飯嘅時候
真係唔明白，做人新抱(叔仔個老婆)成日都話唔得閑嘅
差不多次次都話要幫手(哥哥嘅糖水鋪)
乜佢哥哥間鋪無咗佢兩個鍾會執咩
我做咗咁耐新抱次次都要返去幫奶奶煮餸
雖然都唔係全部我煮
但老人家梗係想成家人一齊食飯
仲係兩個星期先返一次
次次都話唔得閑，都唔明點解!
就嚟佢兩個女都唔認得我地嚟呀!
返去奶奶度之前，例牌同囡囡行吓街
今日同佢買咗兩對鞋
跟住囡囡話請我食糖水喎
"金滿堂"
之前食過一次，啲糖水都幾新穎架
妹妹都係食番上次個個"紅粉佳人"，好好食架，
糖水中仲有幾個心心啫喱
今次我就食一個"紅豆冰"
幾特別架，紅豆鋪係啲碎冰面，啲冰入面仲有雪糕添!
我地仲試咗"麥提莎糯米糍"
細細又煙韌，真係好得意!
不過囡囡咁有心，我梗係唔想佢出錢啦
最後都係我俾錢!
~星期六~跑步~
~星期六~
本來話今日要開始跑步，
之前膝蓋痛，無跑咗成個月，
跟住又落咗成個月雨。
好啦個膝頭唔痛la，要去跑番步，
點知今日又遲咗起身，7點幾先醒，
太陽伯伯咁精神都係唔去la
又搵到藉口唔去，咁懶幾時先跑番呀?
再咁落去實一路肥落去啦!
大老爺就成8點幾先去跑，佢話真係好熱呀，
佢都係跑咗兩個圈咋!
晏晝係下面商場飲茶
環境幾好架，啲食物好有水準，又有一啲幾特色嘅點心，第二間係無見過嘅!
日式炸芝士餅~個心係芝士好香口，裏面啲芝士好煙韌，好好食!
沙薑浸豬腳~我覺得最好食，好夠味!
呢個什菌魚肚好入味呀!
2:30pm係仲有特價點心嚟，大老爺同少少爺每人都食咗兩碗燒鴨/燒肉/油雞米(@$16.8)!佢地話好好味添!
好少地方有嘅牛肉餃!
其實樣樣點心都好有水準!但就好多人等位囉!
訂閱：
文章 (Atom)